Палітолаг: Лукашэнка асцерагаецца завяршэння вайны

• 5.12.2025, 14:34

Сітуацыя ў Беларусі можа змяніцца.

Віцэ-прэзідэнт ЗША Джэй Дзі Вэнс выказаў надзею, што ў найбліжэйшыя тыдні будуць «добрыя навіны» ў пытанні расійска-ўкраінскай вайны.

— У адміністрацыі Трампа ўсё ацэньваюць у суперлятывах: там усё цудоўна і ўнікальна — так, як раней ніколі не было, бо і быць не магло. Таму я лічу, што да падобных ацэнак варта ставіцца дастаткова скептычна, — сказаў украінскі палітолаг Яўген Магда у каментары «Філіну».

— Трэба памятаць, што Джэй Дзі Вэнс і Марка Рубіа у свой час атрымалі своеасаблівы аванс ад Дональда Трампа — яны могуць стаць кандыдатамі ў прэзідэнты ў 2028 годзе. І гэта, з аднаго боку, іх натхняе, а з другога — абмяжоўвае ў дзеяннях.

Палітолаг лічыць, што амерыканскі бок імкнецца завяршыць вайну ва Украіне не з гуманістычных меркаванняў, а таму што хоча вярнуцца да business as usual з Расіяй.

— Крэмль вельмі ўдала знайшоў фактары ўплыву на Трампа, намаляваў яму перспектывы зарабіць вялікія грошы і на гэтым яго злавіў.

З-за гэтага, на жаль, ЗША ператварыліся са стратэгічнага партнёра Украіны ў пасярэдніка, які гандлюе ўкраінскімі інтарэсамі.

Сапраўды гандлюе. Цяпер мы бачым, што ЗША і Расія, у прынцыпе, дзейнічаюць у адным накірунку.

У любым выпадку Украіна не збіраецца капітуляваць, і гэта павінна быць максімальна відавочна ўсім.

Палітолаг таксама лічыць, што Аляксандр Лукашэнка асцерагаецца завяршэння расійска-ўкраінскай вайны, хоць і не падае выгляду.

— Для яго завяршэнне вайны — гэта большая ўвага да яго з боку Крамля і максімальнае расхістванне сітуацыі ў Беларусі. Калі хто-небудзь думае, што паказальная лаяльнасць Лукашэнкі Пуціну стварае нейкія ілюзіі ў Расіі, то глыбока памыляецца.

Я разумею, што Лукашэнка хацеў бы і паўдзельнічаць у аднаўленні Украіны, і яшчэ шмат чаго хацеў бы. Але каб такое хацець, трэба не быць палітыкам, які сцвярджае, што з Беларусі ва Украіну можна прыехаць толькі на трактары, а потым прадастаўляе тэрыторыю сваёй краіны як плацдарм для агрэсіі.