Бундэстаг ухваліў рэформу вайсковай службы ў Германіі

• 5.12.2025, 14:30

Новы закон прадугледжвае істотнае павелічэнне колькасці асабовага складу арміі.

Ніжняя палата нямецкага парламента ўхваліла рэформу вайсковай службы, якой папярэднічалі вострыя дыскусіі ў кіроўнай кааліцыі.

Пра гэта паведамляе Spiegel.

Пасля працяглай барацьбы Бундэстаг прыняў новы закон аб прызыве на вайсковую службу з мэтай узмацнення Бундэсвера.

Віцэ-прэзідэнт Бундэстага Амід Нурыпур (партыя «Зялёныя») абвясціў вынікі галасавання: было пададзена 596 галасоў. З іх 323 галасы «за», 272 — «супраць», 1 устрымаўся

Новы закон прадугледжвае, што 18-гадовыя мужчыны зноў будуць абавязаныя праходзіць прызыўны медыцынскі агляд, але служба са зброяй пакуль застанецца добраахвотнай.

Заканадаўства прадугледжвае значнае павелічэнне колькасці вайсковага персаналу, у першую чаргу на добраахвотнай аснове.

Аднак у выпадку недахопу навабранцаў пазней можа быць уведзена абавязковая служба пасля адпаведнага зацвярджэння ў заканадаўстве. Асабліва спрэчнае пытанне пра тое, хто будзе падлягаць абавязковаму прызыву і як гэта можна рэалізаваць справядліва, яшчэ не вырашана.

Бундэсрат (верхняя палата) яшчэ павінен ухваліць гэты закон. Закон павінен уступіць у сілу ў студзені 2026 года. Папярэдняя сістэма прызыву была прыпыненая ў 2011 годзе.

Партыі кіроўнай кааліцыі дасягнулі кампрамісу па новай мадэлі вайсковай службы ў лістападзе.

Дэпутаты блока ХДС/ХСС крытыкавалі законапраект за тое, што ў ім не пазначана, пры якіх абставінах добраахвотная служба можа перайсці ў абавязковую сістэму. У сувязі з гэтым прыняцце законапраекта ў Бундэстагу зацягвалася.