Ларыса Доліна ўпершыню пракаментавала скандал са сваёй кватэрай

• 5.12.2025, 12:43

Спявачка растлумачыла, чаму маўчала дагэтуль.

Расійская спявачка Ларыса Доліна упершыню пракаментавала скандал са сваёй кватэрай. Яна дала вялікае інтэрв’ю, ананс якога 5 снежня паказалі ў эфіры «Першага канала».

— Чаму я маўчала ўсё гэта доўгі час? Таму што спачатку я была ў шоку. Я была ў такім шокавым стане, што не разумела, як мне жыць далей. Потым, калі пачаліся судовыя разбіральніцтвы, я, у інтарэсах следства, дала падпіску аб неразгалошванні. Я не мела права нічаго каментаваць, ні афішаваць працэс, што адбываўся, — заявіла Доліна.

— То-бок, сапраўды афіцыйная забарона? — удакладніў вядучы.

— Афіцыйная забарона. А потым я фізічна не магла пра гэта гаварыць. Таму тут вельмі важна проста зразумець, што гэта было немагчыма. І толькі цяпер людзі даведаюцца праўду, — сказала Доліна.

Яна таксама згадала, што махляры нібыта сачылі за ёй і яе дзецьмі.

Нагадаем, у сацсетках атрымаў шырокую вядомасць «эфект Доліны». Усё пачалося пасля таго, як у 2024 годзе спявачка аддала тэлефонным махлярам больш за 300 мільёнаў расійскіх рублёў (звыш 3 млн долараў) — у тым ліку грошы ад продажу пяціпакаёвай кватэры ў Маскве. Зразумеўшы, што яе падманулі, Доліна звярнулася ў суд і выйграла яго. У выніку кватэру ёй вярнулі. А пакупніцы, якая засталася без кватэры, прапанавалі спрабаваць вярнуць грошы ў махляроў.

Расійцаў абурыў учынак Доліны, якая пакінула пакупніцу яе кватэры і без жылля, і без грошай. Гледачы пачалі масава здаваць квіткі на канцэрты артысткі.

Тым часам у расійскіх судах пачалі разглядаць падобныя справы.