Печанег нейкі

• Тэлеграм-канал «СерпомПо»
• 5.12.2025, 11:39

Калі Пуцін апранае хакі, ён выглядае яшчэ смешней, чым Мядзведзеў у вайсковай форме.

«Ці мы ўзброеным шляхам вызвалім гэтыя тэрыторыі. Ці ўкраінскія войскі пакінуць гэтыя тэрыторыі і перастануць там ваяваць», — бухнуў цяжкім калібрам пра Данецкую вобласць разышоўшыся Пуцін у інтэрв’ю медыя далёкай, казачнай Індыі: краіне сланоў, Будды, індуістаў і яркіх, пахучых кветак. І вось у гэты чарадзейны свет уварваўся расхрыстаны ваяка з дзікімі вачамі з другога канца свету. Што за качавнік прыбыў? Печанег нейкі …

Дарэчы, калі Пуцін апранае на сябе хакі, то выглядае ён яшчэ смешней, чым Мядзведзеў у вайсковай форме (той дык у любым адзенні падобны да клоуна), нагадваючы ці то школьнага ахоўніка з ЧОПа, ці то супрацоўніка службы бяспекі «Пятёрочки» — немалады, нездаровы, вялы чалавек з дубінкай на поясе і рацыяй, што нясе сваю вахту ледзь не «для прыгажосці». Паглядзіце на фота — і сапраўды падобны!

Што наогул сказаць пра выказванні камічнага Пуціна? Каго ён нагадвае? Персанажа песні Высоцкага «Канатчыкава дача»:

Узвіўся былы алкаголік —

Мацюкальнік і крамольнік:

«Трэба выпіць трыкутнік!

На траіх яго! Даёш!»

Разышоўся — дык і сыпле:

«Трыкутнік будзе выпіты!

Будзь ён паралелепіпед,

Будзь ён круг, ядрына вош!»

Будзе, будзе Данецкая вобласць, геній геапалітыкі. Нікуды не знікне. За тры дні. Як і раней. Мы зразумелі. Выпіце кефіру з халадзільніка. І журавінкі.

Тэлеграм-канал «СерпомПо»