Хутка і дарогі самі будзем чысціць?
- 4.12.2025, 15:55
Беларусаў абурыла новае патрабаванне ўладаў.
У Беларусі ўступілі ў сілу новыя правілы добраўпарадкавання: пры паркоўцы ў дварах і на праездах неабходна расчышчаць сняг у радыусе не менш як аднаго метра ад машыны. За парушэнне дзейнічае адміністрацыйная адказнасць — штрафы да 100 базавых велічынь (4200 рублёў).
Гэта навіна набрала сотні каментароў у TikTok-акаўнце «Хартыі’97». Падаем некаторыя з іх:
«Я прыберу сняг на паркоўцы, калі гэты ўчастак перайдзе ў маю ўласнасць!»
«Калі я расчысціла паркоўку і з’ехала — ці мушу я паводле закону зноў яе засыпаць снегам?»
«Цікава, ці будзе страшна таму, хто будзе хадзіць і гэта фіксаваць?»
«А сняг я буду ў кішэню класці?»
«А з жыровак прыбраць радок пра прыборку прыдамавой тэрыторыі?»
«Чысціць — ладна, а куды сняг?! Да суседа побач?»
«Хутка і пад’езды самі мыць будзем?»
«Давайце ў ЖЭСах прыбяром сантэхнікаў, дворнікаў, электрыкаў — і будзе ўсім шчасце.»
«Калі гэта будзе маё месца — буду чысціць, без пытанняў. А так: я прыберу, а хтосьці стане. Навошта гэта трэба?»
«Абалдзець! Цяпер не паслугі для людзей, за якія яны плацяць, а самі павінны прыбіраць за камунальшчыкаў і дворнікаў. Цяпер на працу трэба выходзіць з дому на гадзіну раней і ўжо крыху стомленым прыходзіць… Пад’ём у 5, да 6 сабраўся, у 6 выйшаў — пачысціў машыну, сняг, прагрэў — і ў 7 выехаў…»
«А падаткі мы за што плацім?»
«З такімі законамі краіна патроху памірае.»
«Буду падмятаць хоць штодня, калі будзе ўласнае месца ў двары.»
«Адкуль бяруцца такія тарыфы на штрафы? Няхай забяспечаць прыбіральным інвентаром!»
«А за дарогі штраф даюць, калі не вычышчаная праезная частка?»
«Няўжо не зразумела: гэта зроблена, каб зняць адказнасць з ЖКГ і спец аўтабазы. Цяпер уся віна на нас. Яны ні пры чым. Вось і ўсё.»
«Дык я мушу пачысціць сняг каля дома вакол аўто, потым паехаў у ТЦ — і там пачысціць вакол аўто месца? А калі чатыры пункты аб’ехаць — паўсюль чысціць?»
«А калі ЖКГ не чысціць дарогі і двары — за гэта таксама будзе штраф, ці гэта іншае?»
«Ля машын уладальнікі чысцяць, а вось цэнтральную дарогу ў двары ЖКГ часта не чысціць!»
«Хто гэта прыдумаў? Няўжо не зразумела, што ў людзей няма замацаванага на паркоўцы месца? Добра, я прыбяру сняг, ад’еду на паўгадзіны, вярнуся — а там занята. І нічога не прад’явіш: месца грамадскае.»
«Я на 7-м месяцы цяжарнасці. Як мне чысціць месца?»
«Можа, тады ў жыроўках прыбраць графу ЖКГ?»
«Калі пад роспіс выдадуць мне месца — тады і буду чысціць. А пакуль поўны прывад дапаможа не займацца гэтай фігнёй.»
«У Беларусі не могуць зрабіць што-небудзь для чалавека — толькі ўсё мацней зацягваюць гайкі.»
«Хутка і дарогі прымусяць чысціць!»
«А куды прыбіраць сняг? Пад суседнюю машыну або ў багажнік?»
«Дык, можа, тады прыбярыце ўсё, што звязана з аплатамі ЖКГ? Усё роўна ніхто нічога не робіць: сметніцы поўныя, смецце валяецца, пад’езды ніхто не мые і не падмятае, пакуль не патэлефануеш. Дык яшчэ і сняг прыбяры — ахрынець!»
«Цяпер яшчэ і для пешаходаў прыдумаюць: ад дома да працы сняг чысціць. І ЖКГ не забываем плаціць за зробленую працу!»