У Беларусі пачалі прадаваць банкаўскія карткі прама ў краме

• 4.12.2025, 11:14

Неіменную Visa цяпер можна ўзяць на касе без візіту ў банк.

БСБ Банк запусціў у Беларусі новы фармат абслугоўвання — імгненныя банкаўскія карткі, якія можна купіць прама на касах крам і АЗС. Пра гэта паведамілі Office Life ў прэс-службе банка.

Карткі прадаюць на касах сеткі крам «Unistore опт&розница», «Семь пятниц XXL» і запраўках «А-100».

У выніку кліенту больш не трэба наведваць аддзяленне, чакаць выпуску карткі або загадзя афармляць заяўку. Цяпер можна купіць яе на касе і актываваць праз мабільнае прыкладанне. Пасля пакупкі спатрэбіцца некалькі дзеянняў: прайсці хуткую рэгістрацыю ў мабільным прыкладанні банка, адкрыць карт-рахунак і актываваць картку. Але гэты працэс цалкам дыстанцыйны, без чакання ў аддзяленні і запаўнення анкет.

Цікава, што картку можна купіць не толькі для сябе, але і для блізкіх людзей, якія не могуць самастойна аформіць яе ў аддзяленнях банка.

Гаворка пра імгненную неіменную банкаўскую картку Visa Classic Instant у беларускіх рублях. Яна выкананая ў дызайне ад БСБ Банка ў выглядзе пліткі шакаладу. Картка працуе з замежнымі сэрвісамі і тэрміналамі, падтрымлівае Apple Pay, Swoo Pay, Xiaomi Pay і Samsung Pay.

У банку заявілі, што «паставілі перад сабой задачу прыбраць любыя бар’еры паміж кліентам і банкаўскім прадуктам». Уладальнікі карткі аўтаматычна атрымліваюць доступ да сэрвісу па кантролі падпісак праз мабільнае прыкладанне БСБ Банка, а таксама становяцца ўдзельнікамі яго праграмы лаяльнасці «Кветка».