Трамп: Я сказаў Мадуру пару рэчаў

• 4.12.2025, 10:37

Прэзідэнт ЗША заінтрыгаваў зместам тэлефоннай размовы з кіраўніком Венесуэлы.

Прэзідэнт ЗША Дональд Трамп заявіў, што падчас тэлефоннай размовы з прэзідэнтам Венесуэлы Нікаласам Мадурам сказаў яму «пару рэчаў». Каментар прагучаў на фоне нібыта намаганняў прыбраць венесуэльскага лідара з пасады і выслаць у іншую краіну.

Пра гэта паведамляе Белы дом.

У прыватнасці, адзін з журналістаў спытаў, ці зноў звязаўся Трамп з Мадурам і ці працуе яго «кампанія ціску» на венесуэльскага лідара. У адказ прэзідэнт сказаў наступнае:

«Самі скажыце. Ці працуе? Гэта не кампанія ціску. Гэта, думаю, значна большае. Але я каротка з ім пагаварыў. Проста сказаў яму пару рэчаў. Пабачым, што з гэтага выйдзе», — адзначыў Трамп.

Таксама ён чарговы раз заявіў, што Венесуэла пасылае ў ЗША наркотыкі і адпраўляе людзей, якіх не павінна адпраўляць.

«Яны нам даслалі... яны спустошылі свае турмы, адправіўшы людзей у нашу краіну», — падсумаваў кіраўнік Белага дома.