Узброеныя сілы Украіны нанеслі ўдар авіябомбай GBU-62 па пункце кіравання акупантаў у Ваўчанску

• 4.12.2025, 9:09

Удар карэктавалі з дапамогай разведвальнага дрона.

Сілы абароны Украіны нанеслі ўдар па пункце кіравання дронамі і вузле сувязі расійскіх захопнікаў у Ваўчанску Харкаўскай вобласці. Відэа атакі апублікавалі ў Telegram-канале «Соняшник».

Як паведамляе ўкраінскае выданне «Мілітарний», для ўдару па мэце была выкарыстана авіябомба GBU-62 з камплектам JDAM-ER. Ва Украіне іх інтэгравалі на знішчальнікі МіГ-29.

«GBU-62 — гэта 500-фунтавы (прыблізна 226 кг, — рэд.) боепрыпас на базе звыклай авіябомбы Mk-82, да якога дададзены камплект JDAM з GPS/INS і планёрны модуль ER для павелічэння далёкасці», — тлумачаць аўтары.

Адзначаецца, што дзякуючы модулю ER пасля аддзялення ад самалёта ў боепрыпаса раскладваюцца крылы. Таму ён не падае па крутой траекторыі, а плануе, што дазваляе пераадольваць дзесяткі кіламетраў.

«Такая схема дазваляе нанесці ўдар з бяспечнай дыстанцыі, калі абарона мэты шчыльная або калі самалёт-носьбіт не можа падыходзіць занадта блізка», — піша рэсурс.

Удар карэктавалі з дапамогай разведвальнага дрона.