Іранскі «Майдан»: да масавых пратэстаў далучыліся студэнты
- 31.12.2025, 14:40
Акцыі адбываюцца на фоне глыбокага эканамічнага крызісу.
В Іране працягваюцца маштабныя пратэсты з-за рэзкага росту кошту жыцця. Да пратэстных акцый, якія раней ахапілі гандляроў на базарах і ўладальнікаў крам, далучыліся студэнты шэрагу ўніверсітэтаў.
Пра гэта піша Al Arabya.
«Майдан» у Іране адбываецца на фоне глыбокага эканамічнага крызісу. Мясцовая нацыянальная валюта імкліва абясцэньваецца, а ўзровень інфляцыі застаецца адным з самых высокіх за апошнія гады. Сацыяльная напружанасць узмацняецца як у сталіцы, так і ў рэгіёнах краіны.
Пратэсты ахапілі ўніверсітэты
Паводле наяўнай інфармацыі, у аўторак сотні студэнтаў выйшлі на акцыі прынамсі ў чатырох універсітэтах Тэгерана. Яны выказваюць незадаволенасць падзеннем даходаў, ростам цэн і адсутнасцю эканамічных перспектыў.
Дзяржаўныя тэлеканалы паказалі кадры, на якіх удзельнікі акцый скандуюць лозунгі з патрабаваннямі эканамічных змен. Паўафіцыйныя агенцтвы пацвярджаюць, што студэнцкі рух усё актыўней далучаецца да пратэстаў.
Улада абяцае дыялог
Прэс-сакратар урада Ірана Фатемех Мохаджерани заявіла пра намер стварыць механізм перамоваў з прадстаўнікамі пратэстных груп.
«Мы афіцыйна прызнаём пратэсты. Мы чуем гэтыя галасы і разумеем, што яны з'яўляюцца следствам сур'ёзнага ціску на ўзровень жыцця людзей», — адзначыла яна.
У той жа час у краіне нагадваюць, што папярэднія хвалі пратэстаў іранскія ўлады неаднаразова падаўлялі сілавымі метадамі.
Чаму людзі выйшлі пратэставаць?
Прычынамі беспарадкаў у розныя гады ў Іране станавіліся эканамічныя праблемы, санкцыі, дэфіцыт вады, а таксама пытанні правоў жанчын і палітычных свабод.
На гэтым фоне курс мясцовай валюты — рыяла — нядаўна ўпаў да рэкорднага ўзроўню — каля 1,4 мільёна за долар ЗША. Пасля гэтага кіраўнік Цэнтральнага банка краіны падаў у адстаўку.
Масавыя беспарадкі адбываюцца ў той час, як прэзідэнт ЗША Дональд Трамп прыгразіў Ірану новымі атакамі, калі Тэгеран паспрабуе аднавіць ядзерную праграму і распрацоўку балістычных ракет.