Ігар Аліневіч месяц трымаў галадоўку ў мазырскай калоніі

• 31.12.2025, 10:27

Палітвязень знаходзіцца ў памяшканні камернага тыпу.

Анархіст, асуджаны на 20 гадоў калоніі, Ігар Аліневіч месяц трымаў галадоўку ў мазырскай калоніі, паведамляе ПЦ «Вясна».

Пра тое, што Ігара перавялі ў Мазыр, стала вядома ў кастрычніку. Туды яго змясцілі пасля заканчэння тэрміну турэмнага рэжыму, на які яго перавялі. Адразу пасля этапавання ў калонію палітвязня змясцілі ў ШІЗА. Цяпер ён знаходзіцца ў памяшканні камернага тыпу.

Палітвязень Ігар Аліневіч — актывіст анархічнага руху, якога затрымалі пры пераходзе мяжы Беларусі ў ноч з 28 на 29 кастрычніка 2020 года. Яго абвінавацілі па шэрагу артыкулаў. У выніку палітвязня прысудзілі да 20 гадоў калоніі ўзмоцненага рэжыму.

Пазней яму ўзмацнілі пакаранне і перавялі на турэмны рэжым у Жодзіне. Пасля гэтага яго неаднаразова змяшчалі ў ШІЗА. У знак пратэсту Аліневіч трымаў галадоўку.

У 2016 годзе Ігар Аліневіч стаў лаўрэатам Нацыянальнай прэміі «Хартыі-97» за абарону правоў чалавека імя Віктара Івашкевіча у намінацыі «За асабістую мужнасць».