У ISW патлумачылі, як Крэмль хоча выкарыстаць заявы пра «атаку» на рэзідэнцыю Пуціна
- 31.12.2025, 9:52
Расія дала «сігнал».
Крэмль працягвае распавядаць пра «атаку дронаў» на рэзідэнцыю расійскага дыктатара Уладзіміра Пуціна ў Валдаі Ноўгарадскай вобласці. Пры гэтым Масква не толькі так і не прадставіла ніякіх доказаў таго, што такая атака сапраўды была, але і заявіла, што ніякія доказы не патрэбныя.
Бязпадстаўныя заявы пра «украінскую атаку» РФ спрабуе выкарыстаць для зрыву мірнага працэсу і «абгрунтавання» сваіх ультыматыўных патрабаванняў да Украіны і Захаду. Пра гэта гаворыцца ў новым матэрыяле Інстытута вывучэння вайны (ISW).
Крэмль настойвае на выдумцы пра «атаку дронаў на рэзідэнцыю Пуціна»
За больш як суткі пасля расійскай заявы пра нібыта здзейсненую Украінай у ноч на 29 снежня дронавую атаку на рэзідэнцыю расійскага дыктатара ў Ноўгарадскай вобласці Крэмль так і не прадставіў ніякіх доказаў гэтай «атакі». Больш за тое: прэс-сакратар расійскага дыктатара Дзмітрый Пяскоў заявіў, што «не павінна быць ніякіх доказаў» гэтага «ўдару», бо, маўляў, расійская СПА яго «адбіла».
На пытанне, ці пакажа Масква абломкі «збітых дронаў», Пяскоў адказаў, што «не можа сказаць» і перанакіраваў пытанне да расійскага ваеннага кіраўніцтва.
Тым часам Расія працягвае спробы «згладзіць» разыходжанні па «атацы 29 снежня», што выявіліся ў заявах Мінабароны РФ і кіраўніка расійскага Міністэрства замежных спраў Сяргея Лаўрова, які першым абвінаваціў Украіну ў «палітыцы дзяржаўнага тэрарызму».
Так, Лаўроў заявіў, што на рэзідэнцыю Пуціна ў Валдаі нібыта ляцела 91 украінскі БПЛА. Гэтая заява прагучала праз шмат гадзін пасля таго, як у расійскім Мінабароны паведамілі, што ў цэлым над рознымі рэгіёнамі «збілі» менш за палову ад названага ліку — 41 беспілотнік. Пры гэтым над Ноўгарадскай вобласцю — толькі 18 з іх.
Такое крычавае разыходжанне не магло застацца незаўважаным, на яго ўказалі шэраг расійскіх і заходніх крыніц. Таму ў Мінабароны РФ узяліся за тэрміновы «антыкрызіс», які выліўся ў публікацыю абноўленага «сітуацыйнага дакладу» ўвечары 29 снежня.
У новым паведамленні ў расійскім абаронным ведамстве заявілі: «збілі», маўляў, 91 беспілотнік, што ляцеў на рэзідэнцыю Пуціна: 41 з іх — над Ноўгарадскай вобласцю, роўна столькі ж — над Бранскай, і адзін — над Смаленскай. Усе яны, паводле дзіўнай празорлівасці Мінабароны РФ, нацэліліся дакладна на Валдай.
Аналітыкі ISW нагадалі: Валдай знаходзіцца прыкладна за 210 км ад мяжы паміж Ноўгарадскай і Смаленскай абласцямі. Да мяжы з Бранскай вобласцю адлегласць яшчэ большая — каля 435 км.
«У Бранскай і Смаленскай абласцях ёсць законныя ваенныя і абаронна-прамысловыя цэлі, якія Украіна цалкам магла б атакаваць у ноч з 28 на 29 снежня, і Украіна ўжо наносіла ўдары па аб’ектах у Бранскай і Смаленскай абласцях раней. Любая сітуацыя палёту украінскіх беспілотнікаў у паветранай прасторы Бранскай і Смаленскай абласцей не азначае безумоўна, што гэтыя беспілотнікі накіроўваліся ў Ноўгарадскую вобласць. Больш за тое, ISW не выявіў ніякіх паведамленняў або доказаў таго, што расійскія войскі збівалі украінскія беспілотнікі над Бранскай або Смаленскай абласцямі ў ноч з 28 на 29 снежня», — разбілі хлусню Крамля аналітыкі.
У ISW адзначылі: за больш як суткі пасля заявы ў сетцы так і не з’явілася ніводнага відэа з месца атакі, якія абавязкова суправаджаюць любыя ўдары Украіны па мэтах у РФ. Расіяне, якія фіксуюць на камеры нават гукі рухавікоў дронаў, раптам цалкам «праігнаравалі» масіраваны налёт БПЛА на рэзідэнцыю расійскага дыктатара.
Таксама расійскія і заходнія крыніцы паведамлялі, што ні жыхары Валдая, ні жыхары бліжэйшых раёнаў не чулі і не бачылі ні дронаў, ні працы расійскіх сістэм СПА, якія яны добра чуюць нават тады, калі тыя спрабуюць паразіць мэты далёка ад Валдая.
Атаку не пацвярджаюць і заходнія разведкі. Так, выданне Le Monde паведаміла 30 снежня, што крыніца, блізкая да прэзідэнта Францыі Эмануэля Макрона, заявіла, што «няма вагомых доказаў» на пацвярджэнне расійскіх заяў пра ўдар па асабістай рэзідэнцыі Пуціна, нават пасля таго, як французскія ўлады праверылі інфармацыю са сваімі партнёрамі.
Навошта Масква выдумала «атаку» на рэзідэнцыю Пуціна
Нахабная хлусня пра «дронавую атаку» па рэзідэнцыі расійскага дыктатара патрэбная Крамлю, каб апраўдаць пастаяннае вяртанне Расіі да патрабаванняў аб капітуляцыі Украіны і Захаду, умовы якой Масква агучвала напрыканцы 2021-га і ў 2022-м гадах.
Так, Пяскоў напярэдадні заявіў, што Крэмль «ўзмоцніць» сваю перагаворную пазіцыю пасля выдуманага «украінскага ўдару», але не будзе агалошваць гэтую новую пазіцыю публічна. Ён дадаў, што Расія не выходзіць з перагаворнага працэсу, але будзе працягваць дыялог найперш з Злучанымі Штатамі.
Некалькі дэпутатаў Дзяржаўнай думы Расіі паўтарылі заявы Пяскова. Адзін з іх заклікаў Маскву прадставіць Украіне мірны план, складзены ЗША і Расіяй, як здзейснены факт. Іншы дадаў, што Расія цяпер можа дамаўляцца «толькі» пра капітуляцыю Украіны.
Тым часам Лаўроў у інтэрв’ю прапагандыстам з Russia Today 30 снежня зноў паўтарыў пачатковыя ваенныя патрабаванні Расіі, сфармуляваныя Пуціным на пачатку поўнамаштабнага ўварвання. Сярод іх — нейтралітэт Украіны, дэмilітарызацыя (скарочванне колькасці украінскіх вайскоўцаў такім чынам, каб Украіна не магла абараніць сябе) і «дэназыфікацыя» (замена цяперашняга украінскага ўрада прарасійскім марыянеткавым урадам).
Таксама Лаўроў запатрабаваў, каб Украіна і Захад прызналі украінскія Луганскую, Данецкую, Запарожскую і Херсонскую вобласці і Крым часткай Расійскай Федэрацыі.
Па словах кіраўніка расійскага знешнепалітычнага ведамства, РФ «перакананая», што ультыматумы, якія Расія вылучыла Злучаным Штатам і Еўропе ў снежні 2021 года, могуць служыць «адпраўной кропкай» для мірных перамоваў.
Большасць гэтых патрабаванняў, падкрэслілі аналітыкі, супярэчыць апошняй публічна даступнай версіі 20-пунктавага мірнага плана ЗША, Украіны і Еўропы.
«29 снежня ISW ацаніла, што Крэмль можа мець намер выкарыстаць верагодны ўдар Украіны па рэзідэнцыі Пуціна, каб апраўдаць сваю адмову ад любых мірных прапаноў, што вынікаюць з нядаўніх двухбаковых амерыкана-ўкраінскіх і шматбаковых амерыкана-ўкраінска-еўрапейскіх перамоваў. Заявы Крамля адносна ультыматумаў Расіі 2021 года, якія азначалі б разбурэнне альянсу НАТА і патрабавалі перагляду архітэктуры бяспекі Еўропы, працягваюць сігналізаваць пра тое, што мэты Расіі ў вайне не абмяжоўваюцца Украінай, і што мірная дамова, якая не ўлічвае расійскія патрабаванні да НАТА і Захаду па-за межамі Украіны, не задаволіць Расію», — рэзюмавалі ў ISW.