У Еўропе адбыўся маштабны транспартны збой

• 30.12.2025, 20:01

Рух цягнікоў Eurostar праз тунэль пад Ла-Маншам паралізаваны.

Міжнародная хуткасная чыгуначная служба Eurostar, якая злучае Вялікабрытанію з Францыяй, Бельгіяй і Нідэрландамі, заклікала пасажыраў сёння не карыстацца яе паслугамі з-за праблем з электразабеспячэннем у тунэлі пад Ла-Маншам.

Паводле вэбсайта Eurostar, колькасць скасаваных цягнікоў, якія павінны былі ехаць праз тунэль пад Ла-Маншам 30 снежня, вырасла да 18.

Пра гэта паведаміла выданне The Guardian.

Eurostar «настойліва» раіць усім сваім пасажырам перанесці паездку на іншую дату з-за праблем з электразабеспячэннем і «няспраўнасці цягніка Le Shuttle», які застрэў у тунэлі, адзначае выданне.

Кампанія заклікала пасажыраў не прыходзіць на станцыю, калі ў іх яшчэ няма квітка, і папярэдзіла, што цягнікі могуць сур'ёзна затрымлівацца або быць скасаваныя ў апошнюю хвіліну.

Шэсць цягнікоў, якія павінны былі адпраўляцца з лонданскага вакзала Сэнт-Панкрас, а таксама з Брусэля і Парыжа, ужо скасаваныя, некаторыя іншыя рэйсы затрыманыя.

Прадстаўнік кампаніі Eurostar не сказаў Reuters, калі адновяцца рэйсы, і адмовіўся паведаміць, колькі пасажыраў пацярпела.

Таксама прадстаўнік Eurostar заявіў агенцтву AFP, што «усе паездкі ў і з Лондана прыпынены да далейшага паведамлення».

«У тунэлі пад Ла-Маншам узнікла праблема з электразабеспячэннем, пасля чаго цягнік-шатл спыніўся там», — паведаміў ён.

На сайце Eurostar пакуль не пазначана, што ўсе цягнікі затрымліваюцца або скасаваныя.