Гамяльчанка купіла новы Geely, але нармальна ездзіць на ім так і не змагла

• 30.12.2025, 17:28

Праблемы з каробкай перадач давялі справу да суда.

Гамяльчанка купіла новы аўтамабіль Geely Emgrand, і ў ім выявіўся істотны недахоп у працы аўтаматычнай каробкі перадач. Суд Цэнтральнага раёна Гомеля абавязаў прадаўца замяніць машыну на аналагічную спраўную, а таксама спагнаў з дылера неўстойку, кампенсацыю маральнай шкоды і штраф, піша «Зеркало».

Іск быў пададзены ў дачыненні да камерцыйнай арганізацыі, у якой гамяльчанка 13 верасня 2023 года набыла новы аўтамабіль Geely Emgrand. Дагаворам куплі-продажу быў устаноўлены гарантыйны тэрмін на тавар — 4 гады або 100 000 км прабегу ў залежнасці ад таго, што наступіць раней.

На працягу гарантыйнага тэрміну ўладальніца аўтамабіля неаднаразова звярталася да прадаўца са скаргамі на некарэктную працу аўтаматычнай каробкі пераключэння перадач (АКПП). Прадавец праводзіў дыягностыку, аднак кожны раз заяўляў, што няспраўнасцяў не выяўлена, і прызнаваў аўтамабіль прыдатным для эксплуатацыі. Патрабаванні пакупніцы аб замене машыны задаволены не былі. Тады жанчына звярнулася ў таварыства абароны правоў спажыўцоў, а яно ад яе імя — у суд.

У іску паведамлялася, што ў аўтамабілі ёсць істотны недахоп, бо збоі ў працы АКПП праяўляліся неаднаразова. Таксама ўказвалася на парушэнне тэрмінаў бясплатнага ўстаранення недахопаў і тэрмінаў задавальнення патрабавання аб замене тавару. Акрамя замены аўтамабіля, у іску патрабавалі спагнання неўстойкі, кампенсацыі маральнай шкоды, страт, судовых выдаткаў і штрафу ў даход бюджэту.

Суд прыняў да ўвагі, што аўтамабіль адносіцца да тэхнічна складаных тавараў. Паводле закону патрабаванне аб яго замене можа быць заяўлена на працягу 30 дзён з моманту перадачы тавару, а па заканчэнні гэтага тэрміну — толькі пры наяўнасці істотнага недахопу.

У межах справы была прызначана экспертыза, якая выявіла няспраўнасці каробкі перадач. Эксперт пацвердзіў у судзе, што аўтамабіль нельга лічыць спраўным, бо загараецца індыкатар няспраўнасці АКПП.

Ацаніўшы доказы, суд прыйшоў да высновы, што выяўлены дэфект з'яўляецца істотным, бо ён праяўляўся неаднаразова. Акрамя таго, было ўстаноўлена, што прадавец парушыў тэрмін бясплатнага ўстаранення недахопаў, паколькі з ліпеня 2024 года рэальныя меры па іх устараненні прыняты не былі. З улікам гэтага суд спагнаў на карысць пакупніцы неўстойку ў 5000 рублёў, а таксама кампенсацыю маральнай шкоды ў 1000 рублёў.

Акрамя таго, прадаўца абавязалі на працягу 14 дзён пасля ўступлення рашэння ў законную сілу замяніць няспраўны аўтамабіль на аналагічны новы належнай якасці. У даход мясцовага бюджэту спагналі штраф у 6000 рублёў.

Апеляцыйная інстанцыя — Гомельскі абласны суд — пакінула рашэнне без змяненняў. Яно ўступіла ў сілу.