Туск: Вайна ва Украіне можа скончыцца на працягу некалькіх тыдняў

• 30.12.2025, 16:32

Польскі прэм’ер падзяліўся прагнозам.

Вайна ва Украіне можа завяршыцца на працягу бліжэйшых тыдняў, заявіў прэм’ер-міністр Польшчы Дональд Туск пасля перамоў з лідарамі еўрапейскіх краін, прадстаўнікамі Канады і НАТА. Пра гэта паведамляе Reuters.

Паводле слоў Туска, у апошні час адбыліся падзеі, якія даюць падставы спадзявацца на адносна хуткае заканчэнне вайны. Пры гэтым ён падкрэсліў, што гаворка не ідзе пра стоадсоткавую ўпэўненасць.

«Калі я кажу, што мір на гарызонце, я маю на ўвазе бліжэйшыя тыдні, а не месяцы або гады. Да студзеня нам усім давядзецца сабрацца разам, каб прыняць рашэнні адносна будучыні Украіны і будучыні гэтай часткі свету», — адзначыў прэм’ер-міністр Польшчы.

Ён таксама заявіў, што гарантыі бяспекі з боку ЗША, прадастаўленыя Украіне, дазваляюць разлічваць на хуткае завяршэнне канфлікту. У той жа час Туск адзначыў, што Кіеву, верагодна, давядзецца пайсці на кампрамісы па тэрытарыяльных пытаннях.