Кліентаў «Беларусбанка» чакае «сюрпрыз» напярэдадні Новага года

• 30.12.2025, 15:14

Што адбылося?

З-за тэхнічнага збою ў кліентаў «Беларусбанка» могуць некарэктна адлюстроўвацца балансы па картках. Пра гэта паведаміла прэс-служба Банкаўскага працэсінгавага цэнтра (БПЦ). У самым «Беларусбанку» пацвердзілі гэтую інфармацыю, піша «Зеркало».

У БПЦ паведамілі пра тэхнічны збой, з-за якога 30 снежня ў кліентаў «Беларусбанка» магчыма некарэктнае адлюстраванне балансу па банкаўскіх картках.

Як патлумачылі ў БПЦ, непаладкі адбыліся ў апаратна-праграмным комплексе. «Зараз праводзяцца работы па ўстараненні дадзенай сітуацыі, у бліжэйшы час балансы па картках будуць урэгуляваныя», — гаворыцца ў паведамленні.

Колькі менавіта часу зойме аднаўленне дадзеных, у цэнтры не ўдакладнілі.

Да гэтага ў «Беларусбанку» на працягу тыдня праводзіліся тэхналагічныя работы.

Нагадаем, маштабны тэхнічны збой у гэтым жа банку і ў некалькіх іншых банках адбыўся таксама ў ліпені гэтага года. Тады ў кліентаў адлюстроўваліся адмоўныя балансы. На поўнае ўстараненне праблемы пайшло больш за суткі.