Кіраўнік Мінздароўя РФ засмуціў Пуціна

• 30.12.2025, 14:03

У стварэнні эліксіра маладосці ўзніклі складанасці.

У Расіі на дадзены момант няма магчымасці стварыць універсальны сродак, што падаўжае маладосць, заявіў міністр аховы здароўя РФ Міхаіл Мурашка.

«Стварыць універсальную таблетку ад старасці пакуль даволі складана. Яна павінна, у першую чаргу, напэўна, уключаць пытанні рэгуляцыі імуннай сістэмы. І гэты накірунак па даўгалецці сёння актыўна фінансуецца ў нашай краіне і за мяжой, паколькі павелічэнне працягласці жыцця і, галоўнае, здаровага жыцця з’яўляецца, у цэлым, прынцыповым для чалавецтва», — паведаміў міністр у інтэрв’ю «Расія-24» (цытата паводле ТАСС).

У верасні 2024 года The Times пісала, што Пуцін, «апантаны ідэяй вечнага жыцця», даручыў вучоным стварыць сродкі супраць старэння. Паводле звестак газеты, Міністэрства аховы здароўя запатрабавала ад навуковых інстытутаў справаздач аб працы над метадамі супрацьдзеяння клеткаваму старэнню, кагнітыўным засмучэнням, астэапарозу і ўмацаванню імуннай сістэмы.

У снежні гэтага года РБК паведамляў, што шэраг буйных навуковых цэнтраў пачалі шукаць спосабы запаволіць старэнне, а таксама вымераць біялагічны ўзрост чалавека і яго ўнутраных органаў.