Балгарыя з 1 студзеня пераходзіць на еўра

• 30.12.2025, 12:13

Краіна дасягнула ўсіх неабходных крытэрыяў.

Балгарыя на гэтым тыдні, як і чакалася, папросціцца з нацыянальнай валютай левам і з 1 студзеня перайдзе на еўра, стаўшы 21-й краінай еўразоны.

Пра гэта паведамляе Reuters.

З 1 студзеня 2026 года Балгарыя павінна стаць 21-й краінай еўразоны — праз два гады пасля таго, як у 2023 годзе еўра ўвяла Харватыя. Сёлета Балгарыя дасягнула ўсіх неабходных крытэрыяў, сярод якіх — паказчыкі інфляцыі, дэфіцыту бюджэту, запазычанняў, стабільнасць абменнага курсу валют.

Пасля ўвядзення еўра Балгарыя, акрамя пераходу на новую валюту, атрымае месца ў Кіраўнічым савеце Еўрапейскага цэнтральнага банка.

Хоць пераход на еўра ставілі мэтай многія балгарскія ўрады, у грамадстве дагэтуль разыходзяцца меркаванні наконт таго, ці гэта ў большай ступені пазітыў ці негатыў для краіны. Так, некаторыя людзі баюцца росту цэн або не хочуць страціць лев як уласную нацыянальную валюту. Сярод бізнесу, які актыўна гандлюе з іншымі еўрапейскімі краінамі, пераважае станоўчае ўспрыманне.

Апошнім часам бізнес ужо пачаў выстаўляць цэннікі на тавары з падвойнымі цэнамі — у левах і еўра. Таксама ў апошнія тыдні па ўсёй краіне стаяць дзяржаўныя інфармацыйныя білборды з абменным курсам і лозунгамі «Агульнае мінулае, агульная будучыня, агульная валюта» і круцяць відэаролікі, дзе нагадваюць пра змяненне.

Нагадаем, пераход на еўра адбудзецца падчас маштабнага палітычнага крызісу, які вядзе Балгарыю да ўжо восьмых датэрміновых парламенцкіх выбараў.