У Польшчы афіцыйна забаранілі Камуністычную партыю

• 3.12.2025, 21:21

Партыя праіснавала ў краіне больш за 20 гадоў.

Канстытуцыйны трыбунал Польшчы прыняў рашэнне аб забароне дзейнасці Камуністычнай партыі РП, прызнаўшы, што яе праграма і ідэалогія супярэчаць палажэнням польскай Канстытуцыі.

Пра гэта паведамляе RMF24.

Суд пастанавіў, што палітычная сіла павінна быць неадкладна выключана з афіцыйнага рэестра партый. Гэта фактычна азначае спыненне яе існавання і ліквідацыю арганізацыі.

Абвяшчаючы рашэнне, суддзі падкрэслілі, што, улічваючы злачынствы камуністычнага рэжыму і мільёны ахвяр рэпрэсій, дзейнасць партыі непрымальная ў дэмакратычнай прававой сістэме.

«У польскім заканадаўстве няма месца для партыі, якая ўслаўляе злачынствы камуністычнага рэжыму», — адзначылі ў трыбунале.

Рашэнне — вынік шматгадовага працэсу. Упершыню пытанне аб ліквідацыі Камуністычнай партыі РП было ініцыявана яшчэ ў 2020 годзе на ўзроўні генеральнага пракурора. У лістападзе гэтага года прэзідэнт Польшчы Кароль Навроцкі паўторна падаў адпаведны запыт.

Камуністычная партыя Польшчы была створаная ў 2002 годзе. Паводле розных ацэнак, яе колькасць вагалася ад некалькіх соцень да прыблізна тысячы сябраў.

Рашэнне трыбунала ставіць кропку ў гісторыі гэтай сілы, якая на працягу ўсіх гадоў заставалася маргінальнай, але неаднаразова прыцягвала ўвагу з-за сваёй ідэалагічнай пазіцыі.