Палова ўкраінцаў гатовая пратэставаць супраць непрымальных саступак Расіі

• 3.12.2025, 17:51

Толькі 5,1% лічаць дапушчальнай саступку тэрыторый агрэсару.

51,4% украінцаў заявілі пра намер удзельнічаць у пратэстных акцыях, калі Украіна падчас перамоў пойдзе на непрымальныя кампрамісы. Такія вынікі апытання, праведзенага Info Sapiens на замову Цэнтра «Новая Еўропа», паведамляе «Еўрапейская праўда».

Згодна з атрыманымі дадзенымі, не гатовыя ўдзельнічаць у пратэстах 44,3% рэспандэнтаў, вагаюцца з адказам — 4,4%.

Адначасова даследаванне фіксуе, наколькі за апошнія гады змянілася ўспрыманне магчымых саступак украінцамі.

Часовую адмову ад акупаваных тэрыторый лічаць абсалютна непрымальнай 40,2% украінцаў. Год таму такога меркавання прытрымліваліся 53,2%, а годам раней — 76,2%. Праўда, цалкам прымальнай гэту саступку лічаць толькі 5,1% украінцаў.

Яшчэ менш — толькі 2% украінцаў — гатовыя да юрыдычнага прызнання акупаваных тэрыторый расійскімі. Катэгарычна супраць гэтага — 76,6%.

Паступова змяншаецца працэнт украінцаў, якія лічаць адмову ад сяброўства ў НАТА абсалютна недапушчальнай, — цяпер так мяркуюць 41,1% (год таму — 48,7%, а два гады таму — 56,9%).

Адмову ад уступлення ў ЕС 51% украінцаў лічаць абсалютна недапушчальнай, што нават больш за леташні паказнік (50,7%).

Таксама за год павялічылася колькасць украінцаў, якія лічаць абсалютна недапушчальным скарачэнне арміі (77,9% супраць 74,5%), а таксама наданне расійскай мове статусу другой дзяржаўнай (73% супраць 70,9%).

Затое змяншаецца працэнт украінцаў, якія лічаць абсалютна непрымальным паменшэнне сумы рэпарацый з боку РФ (58,7% супраць 62,2%), адмову ад крымінальнага пераследу кіраўнікоў РФ і ваенных злачынцаў (65% супраць 68,4%), а таксама скасаванне санкцый (64,1% супраць 64,8%).

Даследаванне праводзілася ў перыяд з 5 да 26 лістапада 2025 года. Выбарка даследавання — 1000 рэспандэнтаў.