Пуцін чытаў Кушнеру гістарычныя лекцыі аб Палтаўскай бітве

• 3.12.2025, 15:21

Расійскі дыктатар зноў удаўся да фантазій.

Падчас закрытай сустрэчы ў Крамлі Пуцін раптам перайшоў да любімага — уласных фантазій пра гісторыю, распавёўшы зяцю Данальда Трампа Джарэду Кушнеру пра Палтаўскую бітву 1709 года. Ідзе гаворка пра адну з ключавых бітваў Паўночнай вайны, у якой войскі Пятра I разграмілі шведскую армію Карла XII разам з часткай казацкіх сіл пад кіраўніцтвам Івана Мазепы.

«Па крайняй меры, Джарэд даведаўся нешта пра Палтаўскую бітву», — каментуе змест перамоў журналіст Майкл Вайс.

Савецкая і расійская інтэрпрэтацыя падзей Паўночнай вайны, падчас якой адбылася Палтаўская бітва, з’яўляюцца адным з краевугольных камянёў, з дапамогай якіх крамлёўская прапаганда спрабуе абгрунтаваць свае правы на Украіну. Пуцін не ўпершыню скажае гісторыю, заяўляючы, што Украіна «створаная» Леніным і Сталіным, ігнаруе міжнародна-прававую рэальнасць пасля 1991 года, спрабуе легітымізаваць агрэсію праз міфалогію «гістарычных тэрыторый». Усё гэта паўтараецца ў кожнай размове з заходнімі суразмоўцамі, незалежна ад тэмы.

Гістарычныя лекцыі — улюбёны прапагандысцкі прыём дыктатара, бо Пуцін гадамі ўцякае ў гісторыю, калі прайграе ў сучасных падзеях, не мае аргументаў і хоча затуманіць рэальнасць. Таму згадка пра Палтаву — гэта проста чарговы віток яго псеўдагістарычнага трызнення.

Нагадаем, у інтэрв’ю амерыканцу Такеру Карлсану Пуцін 25 хвілін даводзіў да гледачоў «гістарычную даведку» пра гісторыю Украіны — ад Рурыка да падзелу Рэчы Паспалітай. На Аляску, паводле паведамленняў СМІ, Пуцін таксама прывёз «гістарычныя дакументы».