У Турцыі найбуйнейшы перавозчык нафты адмовіўся працаваць з РФ

• 3.12.2025, 11:25

Пасля падрыву танкера ў Чорным моры.

Турэцкая суднаходная кампанія Besiktas Shipping, якая валодае пашкоджаным ля ўзбярэжжа Сенегала танкерам Mersin, заявіла пра спыненне ўсіх аперацый з Расіяй з-за звышвялікіх рызык для бяспекі.

Пра гэта паведамляе Reuters.

На мінулым тыдні нафтавы танкер Mersin пацярпеў ад чатырох знешніх выбухаў, калі стаяў на якары паблізу Дакара. У выніку выбухаў судна было сур'ёзна пашкоджана, прычына выбухаў пакуль невядомая.

Праз некалькі дзён пасля інцыдэнту з Mersin яго ўладальніца, кампанія Besiktas Shipping, заявіла, што спыняе ўсе рэйсы ў Расію і з Расіі. Ніякіх аперацый з расійскімі грузамі і замоўцамі не будзе, бо рызыкі занадта вялікія.

«Сітуацыя з бяспекай у рэгіёне значна абвастрылася. Пасля ўважлівай ацэнкі мы прыйшлі да высновы, што рызыкі для нашых суднаў і экіпажаў сталі непрымальнымі... Паколькі бяспека нашага персаналу і актываў з'яўляецца нашым найвышэйшым прыярытэтам, мы спыняем усе такія аперацыі», - сказана ў паведамленні.

Кампанія Besiktas Shipping са штаб-кватэрай у Стамбуле з'яўляецца адным з найбуйнейшых уладальнікаў танкераў у Турцыі. У яе флоце налічваецца 29 танкераў, судны кампаніі неаднаразова перавозілі грузы расійскай нафты.

Тым часам кошт дастаўкі грузаў праз Чорнае мора вырас пасля атак на два танкеры, што накіроўваліся ў расійскі порт, а рост пагроз і патэнцыйных удараў прывёў да павышэння ставак страхавання ад ваенных рызык.

28 лістапада ў Чорным моры, непадалёк ад Басфора, успыхнуў пажар на двух танкерах, якія належаць да расійскага так званага «ценявога флоту». А ўжо 29 лістапада крыніцы РБК-Украіна заявілі, што марскія дроны СБУ Sea Baby нанеслі паспяховы ўдар па двух падсанкцыйных танкерах Kairo і Virat у Чорным моры.

2 снежня ў Чорным моры, прыкладна за 80 міль ад паўночнага ўзбярэжжа Турцыі, пацярпеў ад нападу невялікі танкер Midvolga 2, які перавозіў сланечнікавы алей з Расіі ў Грузію. Але ў гэтым выпадку гэта відавочна была правакацыя расійскага рэжыму: Украіна адразу ж адкінула датычнасць да атакі.