Стыў Уіткоф пакінуў пасольства ЗША ў РФ

• 3.12.2025, 9:18

Спецпрадстаўнік Трампа не адказаў на пытанні журналістаў.

Спецпрадстаўнік ЗША Стыў Уіткоф пакінуў будынак пасольства ЗША ў Расіі, верагодна пасля тэлефоннай размовы з прэзідэнтам Амерыкі Дональдам Трампам.

Аб гэтым паведамляе Цензор.НЕТ.

Расійскія СМІ пішуць, што на пытанні журналістаў ён не адказаў. Пасля гэтага яго картэж накіраваўся ў бок аэрапорта.

Пуцін сустрэўся з Уіткофам і Кушнерам у Маскве

У Крэмлі ўвечары 2 снежня адбылася сустрэча дыктатара Уладзіміра Пуціна са спецпрадстаўніком ЗША Стывам Уіткофам і зяцем Дональда Трампа Джарэдам Кушнерам.

Памочнік расійскага дыктатара Кірыл Дзмітрыеў назваў перамовы «прадуктыўнымі», паведамляюць расСМІ.

Юрый Ушакоў, са свайго боку, падкрэсліў, што кампрамісы па спрэчных пытаннях не знойдзены, а таму сустрэча Пуціна і Трампа ў найбліжэйшы час не плануецца.

«Некаторыя амерыканскія напрацоўкі па ўрэгуляванні расійска-ўкраінскай вайны прымальныя для РФ, некаторыя не падыходзяць», — заявіў ён.

Таксама Ушакоў дадаў, што на сустрэчы абмяркоўвалася некалькі варыянтаў плана па ўрэгуляванні сітуацыі ва Украіне.

Уіткоф можа сустрэцца з Зяленскім

Раней журналіст выдання Axios Барак Равід паведаміў, што амерыканская дэлегацыя пасля перамоваў з Пуціным можа сустрэцца з прэзідэнтам Украіны Уладзімірам Зяленскім.

Паводле журналіста, перамовы могуць адбыцца ў адной з еўрапейскіх краін.