Раналду: Завяршу кар'еру не раней, чым заб'ю 1000 галоў

• 29.12.2025, 20:38

Цяпер на рахунку 40-гадовага футбаліста 956 забітых галоў.

Лідар саудаўскага «Аль-Насра» і зборнай Партугаліі Крыштыяну Раналду расказаў, калі будзе гатовы завяршыць кар'еру. Пра гэта паведамляе BBC.

40-гадовы Крыш быў прызнаны лепшым футбалістам года на Блізкім Усходзе. Падчас цырымоніі ён прызнаўся, што яму становіцца цяжэй гуляць, але ён па-ранейшаму знаходзіць матывацыю.

«Я па-ранейшаму адчуваю страсць да футбола і хачу працягваць. Не важна, дзе я гуляю — на Блізкім Усходзе ці ў Еўропе. Я заўсёды атрымліваю асалоду ад футбола і хачу, каб гэта працягвалася.

Вы ведаеце, якая мая мэта. Я хачу выйграваць трафеі і дасягнуць адзнакі ў 1000 галоў за кар'еру. Несумненна, я гэта зраблю, калі не будзе траўмаў», — заявіў футбаліст.

Мінулым месяцам Раналду даў інтэрв'ю свайму сябру, брытанскаму журналісту Пірсу Маргану. Тады ён сказаў, што яго кар'ера «хутка» скончыцца. «Думаю, я буду гатовы. Вядома, гэта будзе цяжка, напэўна я буду плакаць», — дапусціў партугалец.

Цяпер на рахунку Крыштыяну 956 забітых галоў на прафесійным узроўні. У гэтым сезоне ён правёў за «Аль-Наср» 14 матчаў і 13 разоў паразіў вароты суперніка.