Украінскія дроны знішчылі артсістэму Д-74, якую РФ магла атрымаць ад КНДР

• 29.12.2025, 20:23

Відэа.

Украінскія вайскоўцы знішчылі рэдкі ўзор артылерыі арміі РФ, які, верагодна, мае паўночнакарэйскае паходжанне.

Пра гэта паведаміў вайсковец 413-га палка «Рэйд» Сіл беспілотных сістэм ЗСУ, эксперт па ўзбраенні Defense Express Іван Кірычэўскі.

Паводле яго слоў, падчас адной з баявых аперацый аператары БПЛА выявілі і паразілі 122-мм гармату корпуснай артылерыі Д-74. Асаблівасць гэтага выпадку ў тым, што такія артсістэмы фармальна не знаходзіліся на складах захоўвання Узброеных сіл РФ.

«Д-74 вырабляліся яшчэ ў 1950-х гадах, а потым актыўна пастаўляліся ў краіны камуністычнага блока», — кажа Кірычэўскі.

Версія пра «неўлічаныя запасы» ў Расіі не выключаецца, аднак больш верагодным выглядае варыянт паставак з КНДР, дзе гэтыя сістэмы дагэтуль стаяць на ўзбраенні. Бо раней расійская армія ўжо выкарыстоўвала паўночнакарэйскія копіі 122-мм боепрыпасаў, якія, паводле наяўнай інфармацыі, РФ самастойна не вырабляе.

Ключавой характарыстыкай Д-74 з’яўляецца далёкасць стральбы да 23,9 км, што істотна перавышае магчымасці распаўсюджанай у арміі РФ гарматы Д-30, якая мае максімальную далёкасць да 16 км. Гэта дазваляе праціўніку размяшчаць артсістэму глыбей ад лініі баявога сутыкнення.

Баявая маса Д-74 складае каля 5,5 тоны, тэмп стральбы — 6–7 стрэлаў за хвіліну, абслуга — да 10 чалавек.

«З’яўленне ў расіянаў з восені 2024 года Д-74 «родам» з 1950-х гадоў, на самай справе незалежна ад крыніцы паставак, — прамы індыкатар вострага знясілення артылерыйскіх запасаў РФ», — адзначае вайсковец.

На фоне страт больш як 35 тысяч артылерыйскіх сістэм любыя знешнія пастаўкі становяцца для Крамля крытычна важнымі. Знішчэнне такіх рэдкіх узораў паглыбляе праблемы расійскай арміі ў артылерыйскім кампаненце.