Зяленскі распавёў пра змесціва перамоў Трампа і Пуціна

• 29.12.2025, 12:52

Яны прагаварылі ўсе 20 пунктаў плана.

Прэзідэнт Украіны Уладзімір Зяленскі заявіў, што яго амерыканскі візаві Дональд Трамп абмеркаваў з кіраўніком Крэмля Уладзімірам Пуціным 20-пунктавы «мірны план».

Пра гэта ён сказаў у анлайн-абмеркаванні са СМІ падчас вяртання ў Еўропу, перадае «Еўрапейская праўда».

У Зяленскага спыталі, ці распавёў Трамп яму змесціва размовы з кіраўніком Крэмля.

«Прэзідэнт Трамп мне сказаў, што ён прагаварыў. Была доўгая размова з Пуціным, ён прагаварыў усе 20 пунктаў плана. Пункт за пунктам», — падзяліўся ён.

Украінскі прэзідэнт падкрэсліў важнасць таго, каб усе былі «ў адным кантэксце» і каб Пуцін і Трамп «прагаворвалі менавіта гэты дакумент, а не нейкія іншыя дакументы».

«Ён сказаў, на што гатовы Пуцін. Я пра гэта цяпер не хачу гаварыць. Я сказаў прэзідэнту, што для нас вельмі важна, гэта не першы раз, калі Пуцін нешта кажа, а робіць іншыя справы. Для нас важна, каб словы супадалі з дзеяннямі», — дадаў Зяленскі.