Мінабароны Расіі прадставіла кадры адыходу сваіх войскаў з Куп'янска як доказ кантролю над горадам
- 29.12.2025, 4:00
З 20 лістапада Мінабароны РФ ужо як мінімум чатыры разы абвяшчала пра захоп горада.
Тэлеканал Мінабароны Расіі «Звезда» 27 снежня апублікаваў некалькі відэа з Куп'янска Харкаўскай вобласці Украіны, пра захоп якога ведамства заяўляе з канца лістапада. Гэтыя ролікі мусілі пацвердзіць кантроль РФ над горадам, аднак на адным з іх група расійскіх вайскоўцаў, наадварот, адступае, звярнуў увагу z-канал «Группировка войск ZАПАД», перадае The Moscow Times. «Правы бераг, самая паўночная частка Куп'янска. Але самае цікавае тут тое, што байцы рухаюцца ў бок ВЫХАДУ З ГОРАДА. На відэа ім засталося прайсці яшчэ пару дамоў — і ўсё <�…> З плюсаў — іх вядуць нашы “птушкі”, то-бок мінімальная эвакуацыя прысутнічае. З мінусаў… гэта ўсур'ёз выкарыстоўваюць як доказ нашага кантролю над горадам», — гаворыцца ў допісе.
The Insider геалакаваў відэакадры і высветліў, што ваенныя сапраўды рухаюцца ў бок ускраіны Куп'янска. З 20 лістапада расійскае Мінабароны ўжо як мінімум чатыры разы абвяшчала пра захоп горада. Апошні допіс на гэтую тэму ведамства апублікавала раніцай 28 снежня. У 35-секундным роліку камандзір роты штурмавога атрада 122-га мотастралковага палка групоўкі войскаў «Запад» сцвярджае, што знаходзіцца на паўночным захадзе Куп'янска, дзе яго падраздзяленне «праводзіць штурмавыя дзеянні і знішчае праціўніка». «Перамога будзе за намі. Куп'янск наш!» — заяўляе ён, пасля чаго ідуць кадры атак з дронаў.
27 снежня Мінабароны выклала ролік, дзе начальнік прэс-цэнтра групоўкі войскаў «Запад» гаворыць пра пяць спробаў ЗСУ «прарывацца да Куп'янска». «Усе контратакі адбітыя, страты тэрыторыі не дапушчаны», — запэўнівае ён. У іншым допісе ў той жа дзень Мінабароны піша, што «Куп'янск знаходзіцца пад кантролем падраздзяленняў 6-й гвардзейскай агульнавайсковай арміі групоўкі войскаў “Запад”».
28 снежня начальнік упраўлення камунікацый Аб'яднаных сіл ЗСУ Віктар Трегубаў заявіў, што «расіяне застаюцца акружанымі» ў Куп'янску «без якіх-небудзь перспектыў дэблакады» і «паступова знішчаюцца». Паводле яго слоў, «вельмі смешна» назіраць за рэсурсамі Мінабароны РФ, дзе працягваецца «сімуляцыя» і «аповеды пра кантроль» над горадам.
Упершыню кіраўнік Генштаба РФ Валерый Герасімаў далажыў прэзідэнту Уладзіміру Путіну пра захоп Куп'янска 20 лістапада. Сам кіраўнік дзяржавы заявіў 2 снежня, што горад ужо тыдзень знаходзіцца пад кантролем расійскіх вайскоўцаў.
12 снежня ўкраінскі OSINT-праект DeepState паведаміў, што ЗСУ ў выніку працяглай аперацыі змаглі заблакаваць і акружыць расійскія часткі ў Куп'янску, а таксама «зачысцілі» яго паўночна-заходнюю ўскраіну. У той жа дзень у горад прыбыў прэзідэнт Украіны Уладзімір Зяленскі і апублікаваў відэа, знятае каля стэлы на ўездзе з боку Харкава.
Нягледзячы на гэта, 17 снежня міністр абароны РФ Андрэй Белавусаў зноў заявіў Путіну, што Куп'янск заняла групоўка «Запад», а ЗСУ, паводле яго сцвярджэння, «безвынікова спрабуюць вярнуць» населены пункт пад свой кантроль.
Падчас «прамой лініі» 19 снежня Пуцін яшчэ раз сказаў пра захоп Куп'янска і выказаў скептыцызм адносна паездкі Зяленскага ў горад, агучыўшы меркаванне, што гэта магла быць пастаноўка.
Тым часам z-ваенкары з моманту дакладу Герасімава абвінавачваюць Мінабароны ў хлусні прэзідэнту. 24 снежня яны прызналі, што ЗСУ вярнулі кантроль над Куп'янскам. Тэлеграм-канал «Рыбарь», які вядзе былы супрацоўнік прэс-службы расійскага ваеннага ведамства Міхаіл Звінчук, назваў сітуацыю ў горадзе «горшай за крытычную», адзначыўшы, што абарона РФ «не абрынулася канчаткова толькі з-за працы дронаўодаў на знос».