Названы просты спосаб абараніць лёгкія ад забруджанага паветра

• 28.12.2025, 20:20

Дапаможа вітамін С.

Высокія дозы вітаміну С здольныя часткова абараняць лёгкія ад пашкоджанняў, выкліканых дробнымі часціцамі забруджанага паветра PM2.5. Да такой высновы прыйшлі навукоўцы з Тэхналагічнага ўніверсітэта Сіднэя. Праца апублікаваная ў часопісе Environment International.

PM2.5 — гэта мікраскапічныя часціцы памерам менш за 2,5 мікраметра, якія ўтвараюцца пры аўтамабільных выкідах, лясных пажарах і пылавых бурах. Яны здольныя пранікаць глыбока ў дыхальныя шляхі і звязаныя з развіццём астмы, хранічных захворванняў лёгкіх і раку.

У ходзе працы даследчыкі правялі серыю эксперыментаў на самцах мышэй і на культурах клетак чалавечай лёгачнай тканкі. Частку ўзораў падвяргалі ўздзеянню PM2.5, а затым ацэньвалі, як вітамін С уплывае на ступень клеткавага пашкоджання. Высветлілася, што дабаўка зніжала запаленне, абараняла мітахондрыі — «энергетычныя станцыі» клетак — і змяншала акісляльны стрэс, выкліканы агрэсіўнымі малекуламі.

«Антыаксідантная дабаўка вітаміну С аказалася эфектыўнай у змякчэнні негатыўных наступстваў нават пры нізкіх узроўнях PM2.5, што можа быць карысна для людзей з груп павышанай рызыкі», — адзначылі аўтары артыкула.

Па словах малекулярнага біялога Браяна Алівера, вынікі выглядаюць шматабяцальна, але патрабуюць асцярожнай інтэрпрэтацыі.

«Даследаванне паказвае, што прыём максімальна дапушчальнай дозы вітаміну С можа дапамагчы, аднак перад гэтым важна параіцца з лекарам, каб пазбегнуць перадазіроўкі або непажаданых эфектаў іншых кампанентаў дабавак», — адзначыў ён.