«Дроны могуць раптоўна прыляцець на беларускія НПЗ»
- 27.12.2025, 20:06
Дзеянні лукашыстаў не застануцца без наступстваў.
Украінскі палітолаг Яўген Магда у каментары «Белсату» заявіў, што Лукашэнка разлічвае на тое, што Украіна ўстрымаецца ад дзеянняў у адказ на атакі «Шахедаў» праз Беларусь.
«Лукашэнка, я думаю, спрабаваў заручыцца гарантыямі з боку Злучаных Штатаў пра тое, што Украіна не будзе адказваць. Але мы жывём у свеце, дзе блукаючыя дроны могуць раптоўна прыляцець як у мінскі аэрапорт, так і на нафтаперапрацоўчыя заводы і нават раптам апынуцца на іншых стратэгічных прадпрыемствах Беларусі», — адзначыў палітолаг.
Магда падкрэсліў, што ў беларускім грамадстве няма запыту на вайну з Украінай.
«Трэба разумець, што ў беларускім грамадстве няма жадання ваяваць з Украінай. І Лукашэнка рызыкуе застацца з вельмі вузкім колам асабіста адданых людзей, якія ў выпадку эскалацыі будуць гатовыя падтрымаць яго агрэсіўныя намеры», — заявіў ён.
Паводле яго меркавання, пераважная большасць беларусаў не хоча, каб вайна закранула тэрыторыю краіны.
«Я ўпэўнены, што шараговы беларус не хоча ні вайны з Украінай, ні ўвогуле бачыць, як па тэрыторыі Беларусі прылятаюць дроны ці ракеты», — сказаў Магда.
Пры гэтым палітолаг падкрэсліў, што дзеянні беларускіх уладаў, паводле яго ацэнкі, не могуць заставацца без наступстваў.
«Мы таксама павінны разумець, што дзеянні Лукашэнкі не могуць заставацца беспакаранымі. Я ўпэўнены, што ўкраінскі адказ будзе, і ён будзе асіметрычным», — адзначыў палітолаг.
Ён дадаў, што, нягледзячы на напружанасць на мяжы, Украіна не зацікаўлена ў прамой эскалацыі.
«Хаця цяпер беларуска-украінская мяжа нагадвае лінію фронту, баявых дзеянняў там няма. Украіна не зацікаўлена ў тым, каб даваць падставу для вайны, але гэта не азначае, што ў Лукашэнкі няма ўразлівых месцаў», — заявіў Магда.
Паводле яго прагнозу, наступствы цяперашняй палітыкі Мінска могуць выявіцца ў найбліжэйшы час.
«Я думаю, мы ўбачым іх даволі хутка — магчыма, ужо ў пачатку 2026 года», — сказаў ён.
Раней прэзідэнт Украіны Уладзімір Зяленскі абвінаваціў улады Беларусі ў садзейнічанні Расіі пры арганізацыі атак беспілотнікаў па тэрыторыі Украіны.