У Германіі над аэрапортам заўважылі дроны

• 27.12.2025, 18:20

Сем рэйсаў былі перанакіраваныя.

Аэрапорт нямецкага горада Гановер у федэральнай зямлі Ніжняя Саксонія быў часова закрыты з-за выяўлення дронаў. Як піша агенцтва dpa са спасылкай на прадстаўніка аэрапорта, у суботу, 27 снежня, адлёты і пасадкі былі прыпыненыя напярэдадні ўвечары, у 21:47; забарона дзейнічала да 00:16.

Сем самалётаў былі перанакіраваныя ў Падэрборн, Брэмен, Дзюсельдорф і Франкфурт-на-Майне. З-за таго, што два самалёты не змаглі прызямліцца ў Гановеры, раніцай у суботу былі таксама адмененыя іх адлёты з гэтага аэрапорта — у Франкфурт і Парыж.

Афіцыйных паведамленняў з падрабязнасцямі, што тычацца выяўлення беспілотнікаў, пакуль няма. Паводле звестак газеты Hannoversche Allgemeine Zeitung, спачатку адзін дрон заўважылі паблізу аэрапорта. Праз гадзіну да паветранай гавані набліжаліся яшчэ два лятальныя апараты: тыя, хто чакаў у тэрмінале, бачылі іх няўзброеным вокам, піша газета.

Аэрапорт Гановера спыняў працу з-за дронаў у лістападзе

У пачатку лістапада аэрапорт Гановера таксама прыпыняў працу на 45 хвілін з-за дрона, выяўленага непадалёк ад яго. Тады БПЛА ўбачылі пілоты авіялайнера, што заходзіў на пасадку, і паведамілі пра яго супрацоўнікам аэрапорта. Судзячы па ўсім, дрон лятаў над бліжэйшай прамысловай зонай.