Беларусаў абурыў Саладуха як «навагодні падарунак» ад уладаў

• 27.12.2025, 13:44

Пазітыўных водгукаў пра ідэю не знайшлося.

Старшыня Гомельскага гарвыканкама Уладзімір Прывалаў заявіў, што ў навагоднюю ноч Гомель чакае «асаблівы падарунак» — на плошчы Леніна ля галоўнай ёлкі горада выступіць «легендарны савецкі і беларускі спявак, заслужаны артыст Рэспублікі Беларусь Аляксандр Саладуха». Паводле слоў Прывалава, «спявак падорыць жыхарам і гасцям горада вялікі гадзінны сольны канцэрт, напоўнены любімымі хітамі».

Такім чынам, старшыня гарвыканкама — прыхільнік савецкай і эстрады часоў перабудовы — зноў навязвае гамяльчанам свае музычныя густы, чарговы раз запрасіўшы, верагодна, за бюджэтныя сродкі, артыста сваёй маладосці.

Праграма навагодняй ночы пачнецца апоўначы з выступлення кавер-бэнда «Госнадзор», які таксама выконвае старыя хіты, пасля першай гадзіны ночы на сцэну выйдзе Саладуха, а моладзевая праграма стартуе а другой гадзіне ночы дыскатэкай «пад драйвовыя сэты дысджэя».

Што пра гэта думаюць гамяльчане, паглядзеў «Флагшток». У сацсетках з'явілася мноства негатыўных каментароў. Прывядзём прыклады:

«Чаму добрыя маладыя артысты не ездзяць да нас?»

«Чаму ў Гомель прыязджаюць такія старыя спевакі, прычым на любое свята?»

«Няўжо няма больш цікавага артыста для Гомеля? Мы скінемся, калі што».

«За што нам гэта?»

«Дзякуй, што папярэдзілі, не паедзем на цэнтральную ёлку».

«Гамяльчане, вы дрэнна сябе паводзілі ўвесь 2025 год?»

Пазітыўных водгукаў пра ідэю Прывалава амаль не знайшлося — толькі жартоўныя і іранічныя.