Палк ЗСУ «Скала» увайшоў у Гуляйполе і праводзіць зачыстку

• 27.12.2025, 11:33

Расіяне ўжо страцілі два батальёны.

Украінскія штурмавікі ўступілі ў бой з расійскімі захопнікамі ў Гуляйполі і выціскаюць іх з заходняй часткі населенага пункта. 26 снежня стала вядома, што ў населены пункт увайшлі падраздзяленні 425-га асобнага штурмавога палка «Скала», перадае «Дыялог.UA».

Украінскія вайскоўцы атрымалі заданне ачысціць населены пункт ад расійскіх захопнікаў, якія, як сцвярджаецца, «увайшлі ў яго пад прыкрыццём туману».

На відэа, апублікаваным у акаўнце 425-га АШП у сацыяльнай сетцы X, паказана, як штурмавікі заходзяць у Гуляйполе і пачынаюцца баявыя дзеянні.

Былі сфармаваны зводны атрад і асобныя групы, якія праводзяць зачыстку ў Гуляйполі. На кадрах відэанарэзкі можна ўбачыць, як расійскія захопнікі забягаюць у пакінуты дом, пасля чаго на яго ажыццяўляе скід цяжкі дрон-бомбавік.

Баявыя сутыкненні з ворагам адбываюцца па схеме: выяўленне, блакіроўка, паражэнне і знішчэнне. 425-ы палк актыўна выкарыстоўвае не толькі стралковую зброю, але таксама артылерыю, мінамёты, FPV-дроны, цяжкія дроны-бамбавікі і цяжкую тэхніку.

«Вораг нясе велізарныя страты, ён ужо страціў два батальёны, і падыходзіць канец трэцяму», — паведамілі ў камандаванні штурмавога палка.

Расійскіх захопнікаў працягваюць выбіваць з заходняй часткі Гуляйполя.