НАТА просіць Украіну падзяліцца вопытам знішчэння дронаў

• 26.12.2025, 21:42

Альянс шукае даступныя спосабы збіваць расійскія «Шахеды».

Ваенныя НАТА шукаюць танныя сродкі знішчэння беспілотнікаў замест дарагіх ракет. І, падаецца, ва Украіны ёсць рашэнне. Пра гэта піша Business Insider.

Падкрэсліваецца, што Украіна штодня выкарыстоўвае дроны-перахопнікі для збівання расійскіх «Шахедаў». НАТА бачыць у гэтым не толькі магчымасць танна збіваць варожыя мэты, але і прыкметы таго, куды рухаецца вайна.

Журналісты пішуць, што дроны-перахопнікі з’явіліся сёлета як прыярытэтная інвестыцыя ў абарону Украіны. Бо Кіеў шукае магчымасць апярэдзіць нарошчванне Расіяй вытворчасці сродкаў паражэння. Штодня Украіна вырабляе сотні такіх БПЛА, частка з якіх каштуе ўсяго 2500 долараў. Тады як кошт расійскага «Шахеда» складае не менш за 35 000 долараў.

Перахопнікі істотна пашырылі магчымасці Украіны ў сродках СПА, бо яны здольныя паражаць больш хуткія мэты на большай вышыні, чым гэта могуць рабіць мабільныя агнявыя групы, узброеныя кулямётамі. Убачыўшы гэта, НАТА спрабуе распрацаваць і ўласныя дроны-перахопнікі. І гэтая тэндэнцыя пачала ўзмацняцца ў верасні, калі расійскія дроны парушылі паветраную прастору Польшчы і Румыніі.

Гэтыя інцыдэнты прымусілі НАТА задумацца, як Альянс мусіць супрацьдзейнічаць танным БПЛА і ці мэтазгодна ўздымаць для гэтага знішчальнікі, узброеныя дарагімі ракетамі.

Акрамя таго, Польшча і Румынія цяпер разгортваюць амерыканскую сістэму Merops, якая ўжо збіла больш за 1900 расійскіх мэт ва Украіне. Аднак заходнія краіны супрацоўнічаюць і з Украінай у гэтай сферы. У прыватнасці, у верасні Вялікабрытанія абвясціла пра планы масавай вытворчасці тысяч украінскіх беспілотнікаў-перахопнікаў для Кіева. ЗША таксама вырабляюць гэтае ўзбраенне ў супрацоўніцтве з Украінай.