У Мінску катам прапанавалі навагоднія люксы па 20 рублёў

• 26.12.2025, 20:29

Камунальная гасцініца для жывёл запусціла святочную акцыю.

Дзяржаўнае прадпрыемства «Фаўна горада», падпарадкаванае Мінскаму ЖКГ, запусціла навагоднюю і калядную акцыю для ўладальнікаў катоў. Пры гэтым яна працягнецца даўжэй за Праваслаўнае Раство, піша Telegraf.news.

З 24 снежня па 19 студзеня размяшчэнне катоў у спецыялізаванай гасцініцы прадпрыемства абыдзецца ўсяго ў 20,28 беларускага рубля (каля $6,5) за суткі незалежна ад катэгорыі нумара, паведамілі ў прадпрыемстве.

У межах акцыі, як сцвярджаецца ў паведамленні, па «казачнай цане» можна забраніраваць як стандартныя, так і нумары «люкс» (апошнія ў звычайны час каштуюць каля 40 рублёў/суткі). У кошт пражывання катоў уваходзяць прыбіранне, кармленне і абавязковы ветэрынарны агляд пры засяленні, паабяцалі ў «Фаўне горада».

Гасцініца для хатніх жывёл працуе ў Мінску па адрасе: вул. Тышкевічаў, 1. Паслугі па ператрыманні катоў і сабак — частка дзейнасці камунальнага прадпрыемства, якое таксама займаецца адловам бяздомных жывёл, іх стэрылізацыяй і ўтрыманнем у прытулку, пакуль ім шукаюць новых гаспадароў.