У Вялікабрытаніі 12-гадовы хлопчык уратаваў сябе і маці, якая страціла прытомнасць за рулём

• 26.12.2025, 17:44

Жанчына націснула на педаль газу.

У Уэльсе 12-гадовы хлопчык здолеў накіраваць аўтамабіль сваёй маці ў бяспечнае месца, калі яна страціла прытомнасць за рулём на ажыўленай дарозе.

Пра гэта паведамляе BBC. Нікола Крамп была ў дарозе разам са сваім сынам, калі раптам ёй стала дрэнна. Жанчына страціла прытомнасць, а яе нага націснула на педаль газу — аўтамабіль разагнаўся амаль да 100 км/гадз і працягнуў рух па двухпалоснай дарозе.

12-гадовы Зак сядзеў побач на пасажырскім сядзенні. Спачатку хлопчык спрабаваў разбудзіць маці, але своечасова здолеў ухапіцца за руль і накіраваць машыну на цэнтральную раздзяляльную паласу. Пасля гэтага хлопчык спыніў аўтамабіль і патэлефанаваў у службы экстранай дапамогі.

«Мне было вельмі страшна, але я ведаў, што павінен нешта зрабіць. Калі я тэлефанаваў на 999, я ўбачыў, што ў яе рухаецца жывот, таму зразумеў, што яна дыхае», — цытуе медыя Зака.

Неўзабаве на месца прыбылі паліцыя і парамедыкі. Ні жанчына, ні яе сын не пацярпелі, а дрэнна Ніколе стала праз вельмі нізкі артэрыяльны ціск.

Зака пачаставалі цёплым напоем бясплатна ў кавярні паблізу, калі даведаліся пра яго смеласць. Паліцэйскія таксама былі ўражаныя ўчынкам хлопчыка: яны запрасілі яго ў аддзяленне і ўручылі сертыфікат за праяўленую адвагу.