У Севастопалі ўначы прагрымелі два магутныя выбухі

• 26.12.2025, 15:49

У раёне ваеннага аэрадрома Кача.

У ноч на пятніцу, 26 снежня, у часова акупаваным Севастопалі ў раёне ваеннага аэрадрома Кача прагрымелі два магутныя выбухі.

Маніторынгавы Telegram-канал «Крымскі вецер» са спасылкай на мясцовых жыхароў паведаміў, што першы выбух быў чутны ў 00:54, а другі — у 01:11.

Гукі магутных выбухаў таксама пацвердзіў карэспандэнт праекта «Радыё Свабода» «Крым.Рэаліі».

У «Крым.Рэаліі» ўдакладнілі, што перад выбухамі ў Севастопалі не абвяшчалі паветраную трывогу.

Мінабароны краіны-агрэсара Расіі раніцай заявіла, што супрацьпаветраная абарона «перахапіла і знішчыла» пяць дронаў над тэрыторыяй акупаванага Крыму. У нападзе расіяне абвінавацілі Украіну.