Пуцін патрапіў у пастку пасля публікацыі размоў з Бушам

• Леанід Невзлін
• 26.12.2025, 10:16

Фантастычная блізарукасць.

У ЗША апублікаваны некалькі стэнаграм размоў Уладзіміра Пуціна з Джорджам Бушам-малодшым за перыяд з 2001 па 2008 год. Гэтыя размовы, першая з якіх адбылася амаль 25 гадоў таму, паказваюць: Пуцін ужо тады быў зацыклены на ідэях імперскага рэваншу і наўпрост артыкуляваў іх у размовах з сусветнымі лідэрамі.

У 2001 годзе ён казаў Бушу: «Расіяне добраахвотна адмовіліся ад тысяч квадратных кіламетраў тэрыторыі — нечувана. Украіна, частка Расіі на працягу стагоддзяў, была аддадзена. Казахстан — аддадзены. Каўказ — таксама. Гэта цяжка ўявіць, і ўсё гэта зрабілі партыйныя начальнікі», дадаючы, што пасля распаду савецкай імперыі падманутымі адчуваюць сябе і «народ», і «эліты».

А на сустрэчы ў Сочы ў 2008 годзе — пасля саміту НАТА ў Бухарэсце, дзе абмяркоўвалася пытанне Плана дзеянняў адносна сяброўства Украіны ў альянсе, — Пуцін прачытаў Бушу скарочаную версію сваёй любімай лекцыі: «Гэта штучная краіна, створаная ў савецкі час. Пасля Другой сусветнай вайны Украіна атрымала тэрыторыі ад Польшчы, Румыніі і Венгрыі — гэта практычна ўся Заходняя Украіна. У 1920–1930-я гады Украіна атрымала тэрыторыі ад Расіі — гэта ўсходняя частка краіны. У 1956 годзе Крымскі паўвостраў быў перададзены Украіне…

Гэта стварае пагрозу размяшчэння ваенных баз і новых ваенных сістэм паблізу Расіі. Гэта стварае для нас нявызначанасці і пагрозы. І, абапіраючыся на антынатаўскія сілы ва Украіне, Расія працавала б над пазбаўленнем НАТА магчымасці пашырэння. Расія пастаянна стварала б там праблемы. Навошта? У чым сэнс сяброўства Украіны ў НАТА? Якую выгаду гэта дае НАТА і ЗША? Прычына можа быць толькі адна — замацаваць статус Украіны як часткі заходняга свету. Я не лічу гэтую логіку правільнай».

Далей Пуцін перайшоў да працяглага тлумачэння, чаму сябрам НАТА не павінна стаць Грузія: «Яны лічаць, што пад парасонам НАТА змогуць аднавіць сваю тэрытарыяльную цэласнасць. Ці правільны гэта шлях — распаўсюджваць ваенны парасон НАТА і дазваляць ім пачынаць ваенныя аперацыі ў Абхазіі і Паўднёвай Асеціі? Там пачнецца партызанская вайна, як у Афганістане». Праз некалькі месяцаў пасля гэтай размовы Расія пачне вайну супраць Грузіі.

Навязлівая ідэя аднаўлення імперыі пераследуе Пуціна дзесяцігоддзямі: кожны новы заходні лідар выслухоўваў — і працягвае выслухоўваць — гэтыя адны і тыя ж бздуры. Ужо тады было толькі пытаннем часу, калі словы ператворацца ў войны і генацыдныя практыкі, якія сёння ажыццяўляюцца супраць Украіны. Але Захад зноў і зноў аддаваў перавагу палітыцы замірэння Масквы. Фантастычная блізарукасць.

Леанід Невзлін, «Тэлеграм»