На Божае Нараджэнне ў Чарнігаве дрон РФ трапіў у шматпавярхоўку

• 25.12.2025, 18:15

Загінула жанчына.

Расійскі дрон трапіў у пяціпавярховы жылы дом у Чарнігаве. У выніку ўдару ёсць ахвяры сярод мірнага насельніцтва. Пра гэта паведаміў начальнік Чарнігаўскай гарадской вайсковай адміністрацыі Дзмітрый Брыжынскі у Telegram.

Пападанне ў 5-павярхоўку, у выніку якога ўзнік пажар у кватэры, адбылося ў сераду, 24 снежня. Таксама тады вораг атакаваў аб’ект крытычнай інфраструктуры.

— Папярэдне, адзін чалавек загінуў. Тры чалавекі параненыя, сярод іх адно дзіця, — паведаміў Брыжынскі.

Як паведаміў начальнік Чарнігаўскай абласной вайсковай адміністрацыі Вячаслаў Чаус у Telegram, трапленне варожага БПЛА ў пяціпавярхоўку ў Чарнігаве на Божае Нараджэнне было вельмі жорсткім, бо людзі знаходзіліся дома.

— Загінуў адзін чалавек — 80-гадовая жанчына. Яшчэ 8 чалавек пацярпелі. Трое з іх у цяжкім стане. Гэта папярэднія лічбы, — адзначыў Чаус.

Ён дадаў, што ўдар прывёў да значных разбурэнняў.

Паводле даных Дзяржаўнай службы Украіны па надзвычайных сітуацыях, адбылося разбурэнне дома на 2–4 паверхах.

— Узнікла ўзгаранне. Працягваецца тушэнне пажару і разбор завалаў. На месцы працуюць усе службы, — гаворыцца ў паведамленні.

У Дзяржаўнай службе Украіны па надзвычайных сітуацыях дадалі, што выратавалі 4 жыхароў, яшчэ 9 эвакуявалі з дома.