У Беларусі адбыўся збой у працы «Маланкі»

• 25.12.2025, 15:28

Не працуе найбуйнейшы ў краіне аператар электразаправачных станцый.

Не працуе найбуйнейшы ў Беларусі аператар электразаправачных станцый «Маланка».

Збой у працы адбыўся ўвечары 24 снежня, наступствы дагэтуль не ўхілены. Пра гэта тэлеграм-каналу «Баста» паведамілі чытачы.

«Абсалютна ўсе зарадныя станцыі па краіне не працуюць, — паведаміў жыхар Заслаўя. — Зарадзіцца немагчыма. Тлумачаць гэта тэхнічным збоем і прыбралі абазначэнні ўсіх зарадных станцый з карты прыкладання. Зараз карта прыкладання абсалютна пустая. Яна выдае нейкую памылку».

«У Мінску ўсе зарадкі, якія на дадзены момант працуюць у іншых аператараў, а гэта «Эвика», «Бэтри Флай» і «Зарядка Бай», перагружаныя, — распавядае іншы чытач. — Там чэргі, вялікія чэргі на зарадку. У рэгіёнах складана ўявіць, якая сітуацыя.

Уявіце сітуацыю, калі чалавек, напрыклад, едзе ў Брэст на электрамабілі, прыязджае на зарадку, а яна не працуе. Окей, напрыклад, ён едзе да наступнай зарадкі, але і наступная не працуе. Зарадзіцца няма дзе».