Спявачка Даліна папрасіла дазволіць ёй пажыць яшчэ некалькі месяцаў у прададзенай кватэры

• 25.12.2025, 11:27

Нібыта яна не паспела сабраць рэчы.

Расійская спявачка Ларыса Даліна звярнулася да пакупніцы сваёй кватэры Паліны Лур’е з просьбай дазволіць ёй пажыць там яшчэ некалькі месяцаў. Пра гэта РИА «Новости» паведаміла адвакат прадпрымальніцы Святлана Свірідэнка.

Па яе словах, Даліна патлумачыла гэтую просьбу тым, што не паспявае сабраць рэчы. РБК піша, што яна папрасіла адтэрмінаваць сваё высяленне да 1 сакавіка.

Пазней Свірідэнка паведаміла, што Лур’е не мае намеру дазваляць Даліне заставацца ў кватэры пасля яе высялення:

«Мая даверніца набыла кватэру яшчэ паўтара года таму, каб жыць у ёй з дзецьмі», — цытуе яе ТАСС.

На 25 снежня ў Маскоўскім гарадскім судзе прызначана пасяджэнне па пазове Лур’е аб прымусовым высяленні Даліны. На мінулым тыдні Вярхоўны суд накіраваў справу Даліна—Лур’е на новы разгляд. Права ўласнасці на кватэру Даліны прызналі за яе пакупніцай, Палінай Лур’е, але да рашэння суда другой інстанцыі спявачка мае права пражываць у кватэры.

У мінулым годзе Ларыса Даліна прадала кватэру ў Хамоўніках за 112 млн рублёў 34-гадовай прадпрымальніцы Лур’е. Але пасля адмовілася аддаваць ключы новай гаспадыні, заявіўшы, што трапіла на схему тэлефонных махляроў. Спявачка звярнулася ў Хамоўніцкі суд з пазовам аб прызнанні здзелкі несапраўднай.