У касцёле ў ЗША заўважылі вобраз Багародзіцы
- 24.12.2025, 17:52
Парафіяне касцёла ў Лас-Вегасе сцвярджаюць, што сталі сведкамі цуду.
Парафіяне каталіцкага касцёла святога Тамаса Мора ў Лас-Вегасе (ЗША) заявілі, што сталі сведкамі таго, што, на іх думку, з’яўляецца цудам. Прысутныя паломнікі называюць гэта «боскім знакам».
Паводле сведкаў, незвычайная з’ява адбылася падчас асаблівай службы, калі некалькі вернікаў заўважылі нешта, падобнае на твар, што выявілася ў складках тканіны каля алтара касцёла. Пра гэта паведамляе Fox5 Las Vegas.
Прабашч парафіі, айцец Эдмунд Ннадозіе, распавёў, што спачатку не бачыў гэтага вобраза са свайго месца перад алтаром, у той час як парафіяне пачалі даставаць тэлефоны і здымаць убачанае на відэа. Аднак, прыгледзеўшыся больш уважліва, святар адзначыў, што ўбачыў тое, пра што казалі іншыя.
«Я паглядзеў і падумаў: „О, пачакайце хвілінку“, паглядзеў яшчэ раз — і гэта быў твар, гэта была Багародзіца», — распавёў айцец Ннадозіе.
Паведамленні пра з’яўленне вобраза датуюцца прыкладна 12 снежня, бо менавіта ў гэты дзень у Каталіцкім Касцёле адзначаюць Дзень Багародзіцы Гвадылупскай. Свята прысвечана з’яўленню Дзевы Марыі святому Хуану Дыега у 1531 годзе ў Мексіцы, калі, паводле падання, яна цудоўным чынам пакінула свой вобраз на яго тыльме — традыцыйным мексіканскім плашчы.
Айцец Ннадозіе дапусціў, што з’яўленне вобраза менавіта ў гэты дзень можа мець глыбокі духоўны сэнс, а не быць простым супадзеннем.
«Я думаю, магчыма, Багародзіца пасылала нам пасланне: „Гэй, я ўсё яшчэ побач, сёння — дзень майго свята, і я ўсё яшчэ магу сябе паказаць“», — сказаў святар.
Парафіянін Бэн Ісагіррэ распавёў выданню, што гэты вобраз было цяжка не заўважыць. Калі людзі ўбачылі яго, яны пачалі перашэптвацца і паказваць на тканіну.
«Я зрабіў фота і падумаў: „Гэта сапраўды нешта вельмі незвычайнае і прыгожае“. Я веру, што гэта цуд, знак з нябёсаў. Гэта цудоўна бачыць, і я рады, што быў часткай гэтай хвіліны», — сказаў Ісагіррэ.
Айцец Ннадозіе выказаў надзею, што людзі захаваюць значнасць гэтай падзеі ў сваіх сэрцах на працягу святочнага перыяду. У той жа час спадар Ісагіррэ і іншыя парафіяне перакананыя, што гэты досвед прынёс адчуванне суцяшэння і адзінства — незалежна ад таго, лічыць гэта цудам ці не.