Зяленскі: Украіна хоча мець канкрэтную дату ўступлення ў ЕС

• 24.12.2025, 13:00

Пра гэта ідзе гаворка на перамовах.

Прэзідэнт Уладзімір Зяленскі заявіў, што дата ўступлення Украіны ў Еўрапейскі саюз абмяркоўвалася паміж Украінай і ЗША без пацверджання з еўрапейскага боку на сённяшні дзень.

Пра гэта Зяленскі сказаў падчас сустрэчы з журналістамі ў аўторак, перадае «Інтэрфакс-Украіна».

Уладзімір Зяленскі каментаваў сёмы пункт праекта плана спынення расійска-ўкраінскай вайны, які прадугледжвае, што Украіна стане чальцом ЕС у канкрэтна вызначаны час і атрымае кароткатэрміновы прывілеяваны доступ да рынку Еўропы.

«Даты ўступлення для Украіны на сёння — гэта двухбаковая размова Амерыкі і Украіны без пакуль што еўрапейскага пацверджання. Мы кажам пра тое, што хочам мець канкрэтную дату ўступлення ў ЕС, што гэта правільная гарантыя бяспекі, і ўвогуле мы адчуваем, што Амерыка гэта падтрымлівае», — сказаў Зяленскі.

Прэзідэнт патлумачыў, што Украіна лічыць сяброўства ў ЕС абавязковай гарантыяй бяспекі, нават калі яно ўступіць у сілу праз адзін або некалькі гадоў. «Сяброўства ў Еўрапейскім саюзе — гэта таксама набыццё часткі нашых гарантый бяспекі, і таму мы хочам замацаваць дату — калі гэта адбудзецца. Напрыклад, гэта 2027 год або 2028 год — павінна быць нейкая канкрэтыка, бо без канкрэтыкі гарантыя бяспекі не выглядае як сапраўдная гарантыя бяспекі», — падкрэсліў Зяленскі.