У Расіі пачалі судзіць дзясяткі кіраўнікоў і супрацоўнікаў абаронных кампаній
- 23.12.2025, 21:20
За зрыў дзяржаўнага абароннага заказу.
У Расіі з пачатку вайны ва Украіне да крымінальнай адказнасці за зрыў дзяржаўных абаронных заказаў прыцягнулі як мінімум 34 чалавекі, уключаючы кіраўнікоў і топ-менеджараў абаронных прадпрыемстваў. Пра гэта сведчаць дакументы, апублікаваныя на сайце маскоўскіх судоў агульнай юрысдыкцыі, піша Reuters.
Сярод абвінавачаных, выяўленых агентствам, не менш як 11 чалавек займалі кіраўнічыя пасады ў кампаніях, яшчэ двое адносіліся да катэгорыі топ-менеджменту. Як мінімум пяцёра фігурантаў ужо прысуджаныя да рэальных тэрмінаў пазбаўлення волі — да шасці гадоў, яшчэ каля 15 чалавек утрымліваюцца пад вартай у чаканні суда.
Паводле інфармацыі Reuters, расійскія ўлады раней наўпрост папярэджвалі вытворцаў абароннай прадукцыі пра рызыку турэмных тэрмінаў у выпадку невыканання кантрактных абавязацельстваў па дзяржаўным абаронным заказе.
Агульная колькасць крымінальных спраў, звязаных з дзяржаўным абаронным заказам, за няпоўны 2025 год ужо дасягнула рэкорднага ўзроўню. Паводле падлікаў The Moscow Times, толькі за першыя восем месяцаў цяперашняга года ў суды паступіла 43 такія справы — гэта абсалютны максімум з пачатку вайны. Для параўнання: за ўвесь 2024 год было перададзена 34 справы, за 2023-і — 36, за 2022-і — 32. У тры даваенныя гады колькасць падобных спраў не перавышала 23 штогод.
З 43 спраў, што паступілі з студзеня па жнівень 2025 года, 28 былі ўзбуджаныя непасрэдна за зрыў дзяржаўнага абароннага заказу, 13 — за атрыманне хабару, і 2 — за махлярства ў асабліва буйным памеры. Пры гэтым змянілася структура абвінавачванняў: калі ў бягучым годзе часцей ужываюцца артыкулы аб злоўжыванні паўнамоцтвамі і парушэнні ўмоў кантракта (201.1 і 285.4 КК РФ), то ў 2024 годзе амаль палова спраў была звязана з махлярствам.
Колькасць спраў аб хабарніцтве ў сферы дзяржаўнага абароннага заказу таксама вырасла: за няпоўны 2025 год іх зафіксавана 13, тады як за ўвесь 2024 год — 7, у 2023 годзе — 9, а ў 2022 годзе — 10.