Даследчык НЛА: Іншапланецяне «адкроюцца чалавецтву» на ЧС па футболе

• 23.12.2025, 19:07

Марк Крыстафер Лі заклікаў сусветных лідараў і грамадскасць загадзя падрыхтавацца.

Брытанскі рэжысёр і даследчык НЛА Марк Крыстафер Лі заявіў, што чалавецтва можа сутыкнуцца з першым публічным кантактам з пазаземнай цывілізацыяй падчас чэмпіянату свету па футболе 2026 года. Паводле яго, такую выснову ён зрабіў на падставе аналізу старажытных прароцтваў, сучасных назіранняў НЛА і выказванняў вядомых празорцаў, піша (Daily Star https://www.dailystar.co.uk/news/latest-news/aliens-reveal-themselves-humanity-world-36443963).

Лі сцвярджае, што яго «абшырныя даследаванні» паказваюць на лістапад 2026 года як на магчымы момант раскрыцця існавання іншапланецян — перыяд, які супадае з фінальнымі матчамі чэмпіянату свету. Ён папярэдзіў, што падобная падзея можа прывесці да «глабальных апакаліптычных зрухаў» і заклікаў сусветных лідараў і грамадскасць загадзя падрыхтавацца.

«Падчас вывучэння феномена НЛА і старажытных прадказанняў я выявіў дзіўныя супадзенні, якія паказваюць на 2026 год як на год адкравення», — заявіў Лі.

У якасці аргумента ён спасылаецца на інтэрпрэтацыі прароцтваў балгарскай яснабачкі Вангі, якой прыпісваюць прадказанне першага кантакту чалавецтва з іншапланецянамі падчас маштабнай міжнароднай падзеі.

Паводле слоў Лі, падобныя матывы ён знаходзіць і ў катрэнах Нострадамуса, якія энтузіясты звязваюць з нябеснымі ўварваннямі, працяглымі войнамі, прыроднымі катастрофамі і падзеннем палітычных рэжымаў. Ён лічыць, што гэтыя тэксты можна інтэрпрэтаваць у кантэксце сучасных геапалітычных напружанняў і росту колькасці паведамленняў пра неапазнаныя паветраныя з’явы.

Лі таксама адзначыў, што ў апошнія гады павялічылася колькасць афіцыйных урадавых брыфінгаў, прысвечаных НЛА і так званым неапазнаным паветраным з’явам. На яго думку, магчымaе з’яўленне пазаземных аб’ектаў падчас трансляцыі спартыўнай падзеі з мільярднай аўдыторыяй можа выклікаць глабальную паніку і сур’ёзныя сацыяльныя наступствы.