WSJ: ЗША б’юць па глабальным чорным рынку нафты

• 23.12.2025, 17:43

Гэта ўдар па краінах, якія выкарыстоўваюць ценявыя схемы, уключаючы Кубу, Іран, Расію і Кітай.

Адміністрацыя прэзідэнта ЗША Дональда Трампа пачала маштабную кампанію па перахопе і канфіскацыі нафтавых танкераў, задзейнічаных у глабальным «ценявым» гандлі нафтай, перш за ўсё вакол Венесуэлы. Як паведамляюць амерыканскія ўлады, новая прававая стратэгія накіраваная на падрыў чорнага рынку нафты, які забяспечвае даходы рэжымам, што знаходзяцца пад санкцыямі ЗША, піша WSJ (пераклад — сайт Charter97.org).

У апошнія дні Берагавая ахова ЗША пераследавала танкер «Bella 1», экіпаж якога адмовіўся пусціць на борт для агляду. Гэта ўжо трэцяе судна пасля танкераў «Skipper» і «Centuries», якія перайшлі пад кантроль ЗША. Паводле звестак аналітыкаў, «Skipper» і «Centuries» перавозілі амаль 2 млн барэляў венесуэльскай нафты, тады як «Bella 1», верагодна, ішла пустая.

У Вашынгтоне падкрэсліваюць, што цяпер акцэнт зрушыўся не толькі на санкцыйную нафту, але і на самі судны так званага «ценявога флоту», які абслугоўвае нелегальныя пастаўкі. Аперацыямі займаецца спецыяльнае падраздзяленне пры пракуратуры акругі Калумбія, якое паскорыла падрыхтоўку судовых ордэраў на арышт суднаў.

Улады Венесуэлы назвалі дзеянні ЗША «пірацтвам» і абвінавацілі Вашынгтон у спробе прысвоіць нацыянальныя энергарэсурсы. Тым не менш у Белым доме заяўляюць, што канфіскацыя танкераў можа рэзка скараціць экспарт венесуэльскай нафты, ад якога рэжым прэзідэнта Венесуэлы Нікаласа Мадура атрымлівае ключавыя даходы. Каля 70% паставак краіны ажыццяўляецца менавіта праз падсанкцыйны флот.

Берагавая ахова дзейнічае ў межах праваахоўных працэдур, а не ваеннай блакады, аднак Трамп ужо заявіў пра намер прысвоіць нафту і судны. Эксперты папярэджваюць, што кампанія можа прывесці да перабояў у пастаўках для краін, якія выкарыстоўваюць ценявыя схемы, уключаючы Кубу, Іран, Расію і Кітай, і стаць сур’ёзнай эскалацыяй ціску ЗША на Каракас.