Незвычайны дом пад Мінскам трапіў на аўкцыён

• 23.12.2025, 17:40

За колькі яго прадаюць?

На таргі «Інстытута нерухомасці і ацэнкі» трапіў нестандартны двухпавярховы дом у Бараўлянах. Пачатковы кошт аб’екта складае 185 тысяч долараў, але, хутчэй за ўсё, пакупніку давядзецца ўкласціся і ў касметычны рамонт, піша Realt.

Дом плошчай 212 квадратных метраў размясціўся на вуліцы Рачной, 25 у Бараўлянах.

Галоўнай асаблівасцю будынка з’яўляецца хвалісты дах, трохвугольнае панарамнае шкленне і круглыя акенцы, якія надаюць дому нестандартны выгляд. Катэдж быў узведзены з блокаў у 2007 годзе, утэплены і атынкаваны.

З камунікацый у будынку ёсць электраэнергія, каналізацыя і газавы кацёл для ацяплення. Аднак сістэма халоднага водазабеспячэння, як пазначана ў дакументах, патрабуе рамонту.

На фатаграфіях унутры пабудовы можна заўважыць, што некаторыя памяшканні патрабуюць абнаўлення.

Дом стаіць на прасторнай дзялянцы плошчай 24,5 соткі. Новы ўласнік атрымае зямлю ў доўгатэрміновую арэнду — да 2122 года.

Пачатковы кошт дома складае 543 тысячы рублёў (185 тысяч долараў).

Электронны аўкцыён запланаваны на 30 снежня. Заяўкі на ўдзел у таргах будуць прымацца да 16:00 24 снежня. Пераможцу неабходна будзе падпісаць дагавор на працягу 15 рабочых дзён і цалкам аплаціць лот у наступныя 5 дзён. Да выніковай сумы дадасца ўзнагароджанне арганізатару ў памеры 0,5% ад цаны продажу.