Курыца па 4,85 і булачка за капейкі
- 23.12.2025, 17:02
Беларуска знайшла буклет «Санты» за 2017 год.
Беларуска паказала рэкламны буклет «Санты» за 2017 год. Цэны выклікалі настальгію не толькі ў яе, піша BGmedia.
«Мне нават не верыцца»
Беларуска выклала ў TikTok відэа, у якім паказала рэкламны буклет крамы «Санта» за 2017 год з адпаведнымі цэнамі. Найбольш жанчыну ўразіў кошт курынага філе — 4 рублі 85 капеек па акцыі. Булачка каштавала ўсяго 39 капеек, ёгурт — 40, шакаладка — 1,69, а сок «Сочный» — усяго 2 рублі.
«Мне здаецца, цяпер танней за паўтара рубля ўжо ніводнай булачкі няма, — канстатуе яна. — Сёння я купіла такі ж сок за 6 рублёў».
Гартуючы старонкі, беларуска не хавае эмоцый: «Ой, тут наогул усё такое таннае… Кашмар, так?».
Каментары пад відэа хутка ператварыліся ў спрэчку пра жыццё, грошы і эканоміку. Частка карыстальнікаў упэўненая: параўноўваць цэны без уліку заробкаў — некарэктна.
Іншыя каментатары глядзяць на сітуацыю інакш — праз асабісты досвед.
«Зарплата вырасла ў 2 разы, а цэны — у 4»
«100 рублёў — і ў пакеце амаль нічога»
«Раней у краму ішоў і не глядзеў на цэны, цяпер — зусім іншае»
«Аклад як быў 500 долараў 17 гадоў таму, так і застаўся»
Асабліва эмацыйна рэагавалі на рыбу і салодкае.
«Снікерс — 75 капеек… я забыла, калі ела яго апошні раз»
«Скумбрыя цяпер па 40 рублёў — жартуюць, што пара браць крэдыт».
Што кажуць лічбы: параўнанне цэн у «Санце»
Журналісты BGmedia паглядзелі актуальныя цэны на пазіцыі, якія ўдалося знайсці на афіцыйным сайце «Санты» і параўналі іх з 2017 годам.
У колькі разоў выраслі цэны?
Калі лічыць у працэнтах, то мацней за ўсё падаражэлі:
цеста слаёнае — +475% (у 5,7 разоў)
Снікерс — +385% (амаль у 5 разоў)
крабавыя палачкі — +336%
марская капуста — +289%
Умераны рост паказалі такія прадукты, як: каўбаса ахалоджаная — каля +63% і чыпсы — +47%
У сярэднім большасць пазіцый падаражэла ў 2,5–4 разы.
Стары буклет «Санты» стаў не проста настальгіяй, а падставай задумацца. Для адных — гэта доказ росту даходаў. Для іншых — наглядны сімвал таго, як даражэе звычайнае жыццё.
Ісціна, як заўсёды, дзесьці пасярэдзіне. Але адно дакладна: цэны з 2017 года сёння выглядаюць амаль як фантастыка.