Для аўтаўладальнікаў увялі новую паслугу

• 23.12.2025, 15:01

У чым яна заключаецца?

У «Белтэхагляду» з’явілася новая паслуга — арганізацыя прапануе камплексную перадпродажную дыягностыку транспарту. Наваўвядзенне, як плануецца, здольнае дапамагчы пры набыцці або продажы аўтамабіля — зафіксаваць, ці ёсць няспраўнасці. Пра гэта паведамляецца на сайце «Белтэхагляду».

Новая паслуга прадугледжвае праверку ключавых вузлоў і сістэм транспарту. Падчас дыягностыкі спецыялісты, сярод іншага, ацэняць стан тармазнай сістэмы, рухавіка, падвескі, рулявога кіравання, святлавых прыбораў, кузава і іншых элементаў.

У «Белтэхаглядзе» удакладняюць, што пры праверцы дадаткова выкарыстоўваюць аўтасканар, які дазваляе выявіць схаваныя памылкі і няспраўнасці.

«Таксама прадастаўляецца інфармацыя з гісторыяй пра пройдзеныя дзяржаўныя тэхагляды і прабег аўтамабіля», — паведамляе арганізацыя і дадае: такая дыягностыка дазваляе знізіць рызыкі купіць транспарт са схаванымі дэфектамі, а таксама прыняць рашэнне аб набыцці аўтамабіля або мэтазгоднасці яго рамонту.

Гэтая паслуга даступная на дыягнастычных станцыях у Мінску, Брэсце, Гродне, Магілёве, Гомелі, Віцебску, Бабруйску і Слуцку.

Кошт дыягностыкі — 40 рублёў без камп’ютарнай дыягностыкі, а з гэтай опцыяй — 60 рублёў.