Японія перазапускае найбуйнейшую ў свеце АЭС

• 23.12.2025, 13:03

Праз амаль 15 гадоў пасля Фукусімы.

Японія зрабіла вырашальны крок да аднаўлення працы найбуйнейшай у свеце атамнай электрастанцыі — «Касівадзакі-Карыва», амаль праз 15 гадоў пасля аварыі на АЭС «Фукусіма-1». Рэгіянальны сход прэфектуры Ніігата ў панядзелак выказаў вотум даверу губернатару Хідэё Ханадзумі, які падтрымаў перазапуск станцыі, такім чынам фактычна адкрыўшы шлях да яе паўторнага ўводу ў эксплуатацыю, паведамляе агенцтва Reuters (пераклад — сайт Charter97.org).

АЭС «Касівадзакі-Карыва», размешчаная прыкладна за 220 км на паўночны захад ад Токіа, была спыненая пасля землятрусу і цунамі 2011 года, што прывялі да найбуйнейшай ядзернай катастрофы з часоў Чарнобыля. Тады Японія закрыла ўсе 54 рэактары, а пазней паступова аднавіла працу толькі часткі з іх.

Станцыяй кіруе кампанія TEPCO — тая ж, што эксплуатавала аварыйную «Фукусіму». Гэта выклікае сур'ёзную заклапочанасць у мясцовых жыхароў. Паводле апытання, апублікаванага ў кастрычніку, каля 60% жыхароў Ніігаты лічаць, што ўмовы для перазапуску не выкананыя, а амаль 70% не давяраюць TEPCO.

Няглежчы на пратэсты і крытыку, урад Японіі разглядае атамную энергетыку як ключавы элемент энергетычнай бяспекі. Першы рэактар магутнасцю 1,36 ГВт можа быць запушчаны ўжо ў 2025 годзе, што дазволіць павялічыць энергазабеспячэнне Токійскага рэгіёна прыкладна на 2%.

Улады падкрэсліваюць, што новыя меры бяспекі не дазволяць паўтарэння трагедый, падобных да Фукусімы або Чарнобыля. Аднак праціўнікі атамнай энергетыкі нагадваюць, што нават праз дзесяцігоддзі наступствы такіх катастроф застаюцца балючымі для людзей і навакольнага асяроддзя.