Па ўсёй Украіне пачаліся экстрэнныя адключэнні святла

• 23.12.2025, 10:43

У шэрагу абласцей — блэкаўт.

Раніцай у аўторак, 23 снежня, Расія наносіць камбінаваны ўдар па Украіне з выкарыстаннем ракет і ўдарных дронаў. У шэрагу абласцей ужо абвясцілі пра экстрэннае адключэнне святла.

Мінэнерга краіны паведамляе, што Расія зноў атакуе энергетычную інфраструктуру Украіны. З-за гэтага ў шэрагу абласцей увялі аварыйныя адключэнні электраэнергіі.

«Як толькі дазволіць сітуацыя з бяспекай, выратавальнікі і энергетыкі пачнуць ліквідацыю наступстваў атакі, каб як мага хутчэй аднавіць электразабеспячэнне ў рэгіёнах. Аварыйныя адключэнні будуць адмененыя пасля стабілізацыі сітуацыі ў энергасістэме», — гаворыцца ў паведамленні.

У прыватнасці, экстрэнныя адключэнні ўжо ўведзены ў Кіеўскай, Чаркаскай і Дняпрапятроўскай абласцях. У сацсетках паведамляюць, што ў выніку атакі прапала святло ў Цярнопалі і Хмяльніцкім.