Хакеры скралі ў Spotify усе 86 млн песняў

• 22.12.2025, 19:09

Яны пагражаюць зліць іх у інтэрнэт.

Група хактывістаў здзейсніла маштабны крадзеж даных з музычнага сэрвісу Spotify. Пра гэта паведамляе выданне Billboard.

Паводле паведамлення на сайце Anna's Archive, у выніку несанкцыянаванага доступу былі скапіяваныя метаданыя 256 мільёнаў трэкаў і 86 мільёнаў аўдыяфайлаў агульным аб'ёмам каля 300 тэрабайт (ТБ). На дадзены момант у адкрыты доступ патрапілі толькі метаданыя, а не самі музычныя кампазіцыі.

Прадстаўнік Spotify пацвердзіў, што ў выніку расследавання быў выяўлены факт збору агульнадаступных метаданых, а таксама выкарыстання зламыснікамі метадаў абыходу сістэмы абароны DRM для доступу да аўдыяфайлаў. Кампанія працягвае расследаванне інцыдэнту.

Эксперты адзначаюць, што ўцечка можа мець сур'ёзныя наступствы для індустрыі. Паводле даных CEO стартапа Third Chair Ёава Цымэрмана, тэарэтычна любы карыстальнік з дастатковым аб'ёмам памяці зможа стварыць асабістую бясплатную копію Spotify з усімі песнямі да 2025 года.

Па маштабе архіў шматразова пераўзыходзіць найбольшую адкрытую музычную базу MusicBrainz, якая змяшчае каля пяці мільёнаў трэкаў.

Anna's Archive, якая звычайна спецыялізуецца на захаванні кніг і навуковых прац, заявіла, што праект з'яўляецца часткай місіі па захаванні культурнай спадчыны чалавецтва. То бок сайт не мае намеру выдаляць дадзеную ўцечку.